Rafa neitar sögusögnum

Fréttir um helgina hafa margar hverjar verið þess efnis að Rafael Benítez sé búinn að gera samkomulag við Juventus um að taka við liðinu næsta sumar.

Á opinberri heimasíðu félagsins birtist tilkynning frá Benítez þar sem hann áréttar að hann hafi ekki hitt forráðamenn ítalska liðsins.  Tilkynningin fer hér á eftir.

,,Fréttir frá Ítalíu um helgina hafa sagt að ég sé búinn að vera í viðræðum við Juventus.  Ég vil taka það skýrt fram að ég hef ekki komist að neinu samkomulagi við félagið og hef ekki og mun ekki hitta forráðamenn þess eða annars félags."

,,Ég er með langtímasamning við Liverpool og ég endurtek það sem ég sagði á föstudaginn um að ég er ánægður hér og einbeiti mér bara að því að vinna starf mitt eins vel og ég get til að koma liðinu aftur í eitt af fjórum efstu sætunum.  Næsta skref í því takmarki er nágrannaslagurinn við Everton um næstu helgi."