Dejan fastur í Liverpool!

Króatinn Dejan Lovren, sem Liverpool keypti frá Southampton, hugðist drífa sig til Ameríku að hitta nýju liðsfélaga sína. Hann komst þó hvorki lönd né strönd þegar til átti að taka.

Ástæðan var sú, ef rétt er skilið, að það tók of langan tíma fyrir hann að fá vegabréfsáritun til Ameríku. Ameríkuferð Liverpool hefði einfaldlega verið búin þegar vegabréfsáritunin hefði verið tilbúin!

Dejan Lovren verður því fastur í Liverpool þar til nýju félagar hans koma aftur heim. Hann mun þar æfa með ungliðum Liverpool og það verður örugglega spennandi fyrir þá að æfa með króatíska landsliðmanninum.