Verðum að halda okkar striki

Það voru mikil vonbrigði fyrir leikmenn Liverpool að falla úr leik í Evrópudeildinni í gærkvöldi. Simon Mignolet segir að leikmenn verði samt að halda sínu striki því það sé enn að miklu að keppa á þessari leiktíð.

,,Það eru allir miður sína að vera úr leik og sérstaklega eftir 120 mínútur. Við erum enn með í F.A. bikarnum og erum nærri fjórum efstu sætunum í Úrvalsdeildinni svo það er enn að miklu að keppa á þessu keppnistímabili. Þetta er ekkert auðvelt núna þegar maður er nýkominn út úr búningsklefanum og við erum úr Evrópudeildinni. En við megum ekki láta þetta á okkur fá og verðum að halda okkar striki."

Simon Mignolet náði ekki að verja neina af vítspyrnum Besiktas en hann varði annars mjög vel í leiknum og stóð sig með sóma.