| Grétar Magnússon

Ben Woodburn í landsliði Wales

Ein helsta vonarstjarna Liverpool, hinn 17 ára gamli Ben Woodburn, hefur verið kallaður upp í landsliðshóp Wales fyrir leik liðsins gegn Írlandi í undankeppni HM 2018.

Leikurinn fer fram í Írlandi 24. mars næstkomandi og er nokkuð mikilvægur fyrir bæði lið en Írar eru á toppi D-riðils með 10 stig eftir fjóra leiki en Wales eru í þriðja sæti riðilsins með sex stig.

Þetta verður að teljast mikill heiður fyrir Woodburn en eins og allir vita þykir hann gríðarlega efnilegur leikmaður.  Chris Coleman, þjálfari landsliðsins hafði þetta að segja um valið:  ,,Hann hefur verið að gera góða hluti hjá Liverpool.  Hann hefur verið hluti af yngri landsliðum okkar síðan hann var 13 ára og þegar allir voru mjög spenntir yfir því að hann væri að komast í aðallið Liverpool vorum við ekkert hissa því við vissum allt um hann."

,,Hann æfir með virkilega góðum leikmönnum á hverjum degi og er tæknilega mjög góður.  Hann er að standa sig vel með einu af stærsta félagsliði heimsins í dag og er mjög nálægt því að vera hluti af aðalliðshópnum í hverjum leik.  Hann mun ekki hræðast þá áskorun að koma til liðs við landsliðshóp Wales þar sem hann er vanur því að æfa með sér eldri og reyndari mönnum.  Hann er hluti af landsliðshópi okkar núna því hann verðskuldar það og við hlökkum til að fá hann með okkur í næsta verkefni."

Það sem af er tímabili hefur Woodburn tekið þátt í sjö leikjum með aðalliði Liverpool og eins og frægt er orðið skoraði hann sitt fyrsta mark í sigri á Leeds í Deildarbikarnum á Anfield.  Þar með varð hann yngsti markaskorari í sögu félagsins og spennandi verður að fylgjast með því hvort hann fái tækifæri til að spila með landsliði Wales gegn Írlandi í lok mánaðarins.


TIL BAKA
Nýlegar fréttir
Fleiri fréttir
Fréttageymslan