Spáð í spilin

                                                                  
Loksins, loksins, loksins er boltinn byrjaður! Liverpool mætir Watford í fyrsta leik morgundagsins og verður spennandi að sjá
hvernig okkar menn koma undan sumri og hvort havaríið í kringum Coutinho setur allt úr skorðum.

Það fellur einhvernveginn allt í skuggann af tíðindunum af Coutinho í dag. En eins fullkomlega ömurlegt og það væri að missa hann þá held ég að það sé enn ömurlegra að vera með mann í hópnum sem vill komast burt. Það er enginn stærri en félagið. YNWA!

Því miður er þetta Coutinho mál að taka á sig sorglega mynd, en við verðum víst að sætta okkur við það að lið eins og Barcelona fá yfirleitt þá leikmenn sem þau vilja fá á endanum. 

Eins og staðan er í dag er ekki hægt að segja að Liverpool hafi gert gott mót á markaðnum í sumar. Salah er vissulega spennandi leikmaður, en maður var að vonast eftir meiru. Van Dijk kemur reyndar sjálfsagt á endanum, en það hefði þurft að fá fleiri sterka menn. Keita hefði verið frábær kostur. Vonandi kemur hann næsta sumar. 

En að leiknum á morgun. Clyne og Lallana eru meiddir og Coutinho verður ekki með. Þá er Sturridge eitthvað tæpur eins og venjulega og Milner líka. Aðrir aðalliðsmenn eru í ágætu standi held ég.

Miðað við æfingaleikina sýnist manni að  Alexander-Arnold, Matip, Lovren og Moreno verði í vörninni og Mané og Salah á sitthvorum kantinum. Væntanlega verður Firmino á toppnum, en Solanke gæti líka fengið sjénsinn. Og jafnvel Sturridge, ef hann er leikfær.

Þótt Karius hafi spilað slatta í sumar verður Mignolet í markinu. Henderson er svo held ég eini miðjumaðurinn sem er alveg öruggur. Eitthvað segir mér að Wijnaldum og Grujic verði með honum, en hvað veit ég? 

Allavega byrjar boltinn á morgun og ég hlakka til að horfa. Ég er að rembast við að vera svartsýnn fyrir tímabilið, svona til að haust- eða janúarskellurinn verði ekki eins harkalegur og undanfarin 27 ár, en ég get það bara alls ekki. Ég spái 3-0 sigri Liverpool. Salah, Mané og Matip skora.

YNWA!