12 stigum á eftir City á sama tíma í fyrra

Það má ýmislegt segja um Liverpool liðið á þessari leiktíð og ef maður er ennþá með hugann við hörmungina í Belgrad í gær þá getur maður auðveldlega fundið fullt af hlutum til að gagnrýna. En það má þó ekki gleyma því að þegar litið er á stigasöfnun í deildinni er Liverpool í töluvert betri málum en á síðustu leiktíð - og í rauninni í miklu betri málum en maður leyfði sér að vona fyrir tímabilið. 

Á sama tíma í fyrra var Manchester City reyndar á enn meira flugi en núna, voru með 31 stig af 33 mögulegum. Liverpool var á þessum tíma með 19 stig og í 5. sæti deildarinnar, heilum 12 stigum á eftir City.

Nú er City með 29 stig af 33 mögulegum og Liverpool með 27 stig. Það er bæting upp á 8 stig, sem er ekkert smáræði. 

Í 9. umferð á síðustu leiktíð tapaði Liverpool illa fyrir Tottenham 4-1 og það var ákveðinn vendipunktur. Eftir Tottenham leikinn lék liðið 18 leiki í röð án taps, þar til að botnlið Swansea lagði heillum horfið Liverpool lið 1-0 á kolsvörtu mánudagskvöldi í janúar.

Nú er bara að vona að tapið gegn Rauðu Stjörnunni marki álíka tímamót og Tottenham tapið. Það getur auðvitað brugðið til beggja vona, en við verðum að vona það besta. 

YNWA!