| Heimir Eyvindarson

Öruggur sigur fótboltans

Liverpool valtaði yfir Newcastle á Anfield í dag. Lokatölur urðu 4-0 og Liverpool er með sex stiga forystu á toppi deildarinnar. Gleðileg jól! 

Klopp gerði þrjár breytingar frá leiknum gegn Wolves á föstudaginn, TAA, Shaqiri og Wijnaldum komu inn fyrir Keita, Fabinho og Milner, sem er að glíma við einhver smá meiðsli. 

Það er ekki hægt að segja að leikplan Rafa Benitez hafi verið frumlegt. Eins og við var að búast parkeraði hann rútunni rækilega og treysti á að Liverpool kæmist ekki í gegnum 10 manna varnarmúr gestanna. Honum varð þó ekki kápan úr því klæðinu því strax eftir 11 mínútna leik var Liverpool komið yfir. Markið kom úr óvæntri átt, en það gerði Dejan Lovren með aldeilis frábæru viðstöðulausu skoti eftir að Lascelles hafði skallað boltann beint fyrir fætur hans. Frábær afgreiðsla hjá Lovren. 
Liverpool var miklu betra liðið allan fyrri hálfleikinn en þrátt fyrir það urðu mörkin ekki fleiri. Staðan 1-0 í hálfleik. 

Það var ekkert plan-b í gangi hjá Newcastle og þessvegna hélt seinni hálfleikurinn einfaldlega áfram á sömu nótum. Liverpool var margfalt betra og oftast nær voru allir leikmenn gestanna á eigin vallarhelmingi. Strax á 2. mínútu seinni hálfleiks fékk Liverpool frekar ódýra vítaspyrnu þegar Salah fór niður í teignum. Egyptinn fór sjálfur á punktinn og skoraði af öryggi. Staðan 2-0. 

Liverpool hélt áfram að stjórna öllu á vellinum og eins og venjulega gerði Benitez enga breytingu fyrr en eftir 70 mínútur. Skiptingar hans breyttu samt engu og í raun alveg ótrúlegt á þessum tímapunkti að Liverpool skyldi aðeins vera með tveggja marka forystu. 
Á 79. mínútu veitti Shaqiri síðan Newcastle náðarhöggið þegar hann skoraði af markteig eftir frábæra sókn. Sex mínútum síðar skoraði svo Fabinho sitt fyrsta mark fyrir Liverpool þegar hann skallaði boltann í netið eftir hornspyrnu frá Salah. 
Niðurstaðan á Anfield 4-0 sigur og það sem meira er, Manchester City tapaði fyrir Leicester þannig að við erum með 7 stiga forystu á City og sex stiga forystu á Tottenham sem skaust upp í annað sætið í dag með stórsigri á Bournemouth. 

Liverpool hafði algjöra yfirburði á öllum sviðum fótboltans í dag. Liðið var 76% með boltann, átti helling af flottum sóknum og nokkur ágæt færi. Þrátt fyrir að Newcastle lægi í vörn allan leikinn. Það var virkilega sætt að vinna þennan leik og það er orðið allt annað að sjá til liðsins í leikjum sem þessum. Þolinmæði, hugmyndaauðgi, samvinna og þor skópu þennan sigur í dag. Liðið var allt gott, allir varamenn skiluðu sínu og liðið á einfaldlega skilið að sitja á toppnum. 

Næst á dagskrá eru tveir hrikalegir leikir, fyrst gegn Arsenal á laugardaginn og síðan gegn City 3. janúar, en lærisveinar Guardiola hljóta að koma eins og öskrandi ljón í þann leik. 

Maður leiksins:
Maður gæti næstum því valið hvern sem er í dag, en ég vel Shaqiri. Hann er alltaf á vaktinni, hrikalega kvikur og útsjónarsamur og skoraði gott mark. 

Liverpool: Alisson, TAA, Robertson (Clyne á 82. mín.), Lovren, Van Dijk, Wijnaldum (Fabinho á 62. mín.), Henderson, Shaqiri, Firmino (Sturridge á 69. mín.), Mané, Salah. Ónotaðir varamenn: Mignolet, Keita, Lallana og Origi.

Mörk Liverpool:
Lovren á 11. mín., Salah á 47. mín.(víti), Shaqiri á 79. mín., Fabinho á 85. mín.




TIL BAKA
Nýlegar fréttir
Fleiri fréttir
Fréttageymslan