Gerrard seldur fyrir 150.000 pund !

Þessi fyrirsögn hljómar ansi ótrúlega enda er hún aðeins til gamans gerð.  Þannig er mál með vexti að vaxmynd af Steven Gerrard verður sýnd í hinu fræga vaxmyndasafni Madame Tussauds í London.

Vaxmyndin verður staðsett í sérstöku gagnvirku íþróttasvæði (Sports Zone) í safningu og verður vaxmynd fyrirliðans klædd búningi félagsins sem hann gaf sjálfur til verksins.

Gerrard sagði af þessu tilefni:  ,,Það er virkilega skemmtilegt að hafa mína eigin vaxmynd í Madame Tussauds safninu."

Unnið hefur verið að vaxmyndinni síðan í október á síðasta ári þegar vaxmyndasmiðirnir hittu Gerrard á æfingasvæðinu á Melwood.  Á meðan Gerrard sat fyrir voru teknar yfir 300 mælingar og myndir til að vinna með.  Myndin er nú tilbúin og er kostnaðurinn í kringum 150.000 pund sem eru tæpar 31 milljón íslenskra króna á núverandi gengi.

Liz Edwards, fjölmiðlafulltrúi sagði þetta um málið:  ,,Við erum hæstánægð og bjóðum Steven Gerrard velkomin á þessa sérstöku sýningu á HM ári.  Hann mun ganga til liðs við félaga sína í landsliðinu, þá David Beckham og Wayne Rooney og gestir munu geta reynt sína eigin hæfni í knattspyrnu við þessa snillinga.

Þetta sérstaka íþróttasvæði í Madame Tussauds safninu mun sýna marga fræga íþróttakappa, t.d. þá Mohammed Ali, Jesse Owens og Lewis Hamilton svo einhverjir séu nefndir.