Ruben Amorim vísar öllu á bug!

Ruben Amorim vísar öllum fullyrðingum á bug þess efnis að hann hafi verið í viðræðum um að taka við sem framkvæmdastjóri Liverpool. Sky í Þýskalandi fullyrti á dögunum að Portúgalinn hefði gert munnlegt samkomulag við forráðamenn Liverpool. Ruben, sem er framkvæmdastjóri Sporting Lissabon, hafði þetta að segja um málið.

,,Ég hef ekki farið í neitt viðtal við forráðamenn Liverpool og ég hef ekki gert samkomulag við eitthvað félag. Það er einfaldlega ósatt. Ég er framkvæmdastjóri Sporting og vil vinna titla hérna. Ég hef ekki hitt forráðamenn annarra félaga. Engin samkomulög hafa verið gerð. Trúiði mér! Hættiði svo þessum söguburði. Ég mun ekki ræða þetta meira!"

Svo mörg voru þau orð! Sporting er sem stendur á toppnum í Portúgal með sjö stiga forystu á Benfica. Liðið er líka komið í úrslit í bikarkeppni Portúgals.