Bræðurnir Diogo og André bornir til grafar

Bræðurnir Diogo José Teixeira da Silva og André Filipe Teixeira da Silva voru í morgun bornir til grafar í heimabæ sínum Gondomar nærri Porto í norðurhluta Portúgal. Bræðurnir fórust í bílslysi á Spáni á fimmtudaginn. 

Andre Slot, framkvæmdastjóri Liverpool, og margir af núverandi og fyrrum leikmönnum liðsins fylgdu liðsfélaga sínum og vini til grafar. Roberto Martinez, landsliðsþjálfari Portúgals, og landsliðsfélagar Diogo voru við útförina. Portúgal vann einmitt Þjóðadeildina fyrr í sumar. Fjöldi fólks fylgdist með útförinni. Kirkjan var full og fólk var líka utan við kirkjuna en þeir bræður voru virtir og elskaðir í heimabæ sínum og nærsveitum því þeir höfðu látið margt gott af sér leiða. 

Virgil van Dijk, fyrirliði Liverpool, bar rauða blómaskreytingu frá kirkju með númerinu 20 sem var númer Diogo hjá Liverpool. Andrew Robertson hélt á samskonar blómaskreytingu með númerinu 30 sem var keppnisnúmer André. Hann lék með Penafiel í heimalandi sínu. 

Diogo var fæddur 4. desember 1996 og André 28. apríl árið 2000. Diogo lætur eftir sig eiginkonu, Rute Cardoso, og þrjú börn. Tvo syni og dóttur. Diogo og Rute höfðu verið lengi saman og giftu sig í Gondomar 22. júní síðastliðinn. Þau giftu sig í kirkjunni þar sem útförin fór fram í núna í dag.

Hvíl í friði Diogo og André.