Ákveðið í rútunni

Það er í mörg horn að líta fyrir stórleiki og framkvæmdastjórar verða að taka margar mikilvægar ákvarðanir. Sumar eru teknar með löngum fyrirvara en aðrar á síðustu stundu. Rafael Benítez knattspyrnustjóri Liverpool segir að hann hafi tekið ákvörðun um það í rútunni á leiðinni til Anfield að nota Fernando Torres í leiknum gegn Manchester United.

Það var vitað að Fernando væri tæpur vegna meiðsla því hann hafði misst af tveimur síðustu leikjum Liverpool. Steven Gerrard hafði verið úrskurðaður óleikfær þannig að hann gat ekki leikið í leiknum mikilvæga gegn Manchester United.

Liverpool varð að vinna þennan leik og Rafael ákvað að taka þá áhættu að láta Fernando spila í von um hann skilaði sínu. Þessi áhætta, sem hann tók með því að tefla landa sínum fram, borgaði sig því Fernando skoraði fyrra markið í 2:0 sigri Liverpool.

,,Ég talaði við Fernando í rútunni á leiðinni og það var þá sem ég sannfærðist um að hann gæti spilað. Það var erfitt að taka þá ákvörðun að tefla Fernando fram. Hann hafði ekki verið að æfa frekar en Steven Gerrard. En eftir að ég talaði við hann ákváðum við að það væri betra að láta hann hefja leikinn. Það mátti sjá að hann var ekki 100% leikfær en stundum getur 80% heill Fernando skipt sköpum. Við urðum að fara varlega og því tók ég hann út af undir lokin."

Fernando Torres hefur nú skorað níu mörk á keppnistímabilinu og er markhæstur í Úrvalsdeildinni.