Algjör draumur!

Ferill hjá markmanni getur ekki byrjað betur. Hann ver víti á síðustu mínútu síns fyrsta leiks og tryggir liðinu sínu sigur! Þetta gerði Simon Mignolet í gær. Hann gerði svo sem gott betur því hann varði líka skot í kjölfarið. Algjörlega mögnuð tvöföld markvarsla sem fer beint í annála Liverpool Football Club. Það kom ekki á óvart að Belginn talaði um draumastund eftir leikinn. Simon hafði meðal annars þetta að segja í viðtali við Liverpoolfc.com 

,,Maður á sér drauma um svona og þess vegna er maður auðvitað í skýjum þegar draumarnir rætast. Þetta er auðvitað gott fyrir sjálfstraustið mitt. Næsti leikur verður miklu auðveldari fyrir mig en leikurinn í dag. Ég náði að komast í gegnum fyrstu fímmtán mínúturnar og allt var miklu auðveldara eftir að ég varði fyrsta skotið. Þá varð ég rólegri og allt varð miklu auðveldara."

En hvað skyldi hafa farið í gegnum hugann á Simon Mignolet þegar hann beið eftir að Jonathan Walters tæki vítaspyrnuna?

,,Á svona stundu veit maður ekki hvað alveg hvað fer í gegnum hugann. Þegar allt er orðið rólegt mun ég íhuga málið og vonandi taka jákvæða reynslu úr þessu öllu. Við verðum bara að halda okkur á jörðinni og vera einbeittir. Í næstu viku eigum við erfiðan leik á móti Aston Villa. Mestu skipti að við náðum þremur stigum í dag. Mér fannst við verðskulda það miðað við hvernig við spiluðum og færin sem við sköpuðum okkur."

,,Það var auðvitað mjög ánægjulegt að finna stuðning áhorfenda þegar maður varði svona undir lok leiks. Þetta hlýtur að vera gott fyrir sjálfstraustið mitt í komandi leikjum. Allir voru ánægðir því við ætluðum okkur að vinna leikinn. Það tókst, við snúum okkur núna að næsta leik og einbeitum okkur að því að vinna aftur."