Spáð í spilin

Liverpool komst aftur á sigurbraut með góðum útisigri á Watford. Um leið náði liðið að koma sér í þá stöðu að hafa örlög sín í baráttunni um Meistaradeildarsætin í eigin höndum. Í raun er ekki hægt að biðja um betri stöðu. Það er aldrei þægilegt að þurfa að treysta á að aðrir fari út af sporinu. En um leið og maður hefur tök á stöðu mála verður að færa sér það sér í nyt.


Hið stórfenglega mark Emre Can gegn Watford kom Liverpool í kjörstöðu en það mátti ekkert út af bera í þeim leik og í viðbótartíma áttu heimamenn skot í þverslá. En liðið sýndi styrk eftir að hafa sýnt veikleikamerki á móti Crystal Palace en í þeim leik hefði Liverpool átt að ná þremur stigum eftir að hafa náð frumkvæði. 



Leikurinn við Crystal Palace var á Anfield og nú hefur Liverpool leikið þar tvívegis, á móti liðum í neðri hluta deildarinnar, án þess að vinna. Á undan leiknum við Crystal Palace gerði Liverpool jafntefli við Bournemouth. Það að klára ekki heimaleiki eftir að hafa komist í vinningsstöðu má ekki endurtaka sig til loka leiktíðarinnar. Liverpool á tvo heimalieki eftir og á morgun kemur Southampton í heimsókn. Það má ekki bregðast að vinna þann leik!

Liverpool og Southampton hafa þrisvar sinnum leitt saman hesta sína það sem af er keppnistímabilsins. Liðin skildu án marka í Southampton í deildinni og svo vann Southampton báða leiki liðanna í undanúrslitum Deildarbikarsins með einu marki. Liverpool tókst ekki að skora eitt einasta mark í þessum þremur leikjum. Það þarf að breyta þessu á morgun!

Southampton er óútreiknanlegt lið. Þegar það spilar vel er erfitt að fást við það eins og kom í ljós í Deildarbikarleikjunum. Southampton hefði svo verðskuldað að vinna úrslitaleikinn eftir að hafa spilað stórvel á móti Manchester United. En á milli er liðið einbeitingarlaust og slakt. 


Liverpool hefur engar málsbætur ef ekki tekst að vinna. Adam Lallana er aftur kominn til leiks og Philippe Coutinho á að vera leikfær eftir að hafa farið meiddur af velli á móti Watford. Það eru þrír leikir eftir. Ef Liverpool vinnur þá alla næst markmiðið. Liverpool nær að vinna Southampton 2:1. Roberto Firmino og Adam Lallana skora mörkin sem gætu ráðið miklu um hvernig lokastaðan í deildinni verður.

YNWA