Hann lærir af þessu!

Jürgen Klopp, ekki frekar en öðrum tengdum Liverpool, var ekki skemmt þegar Darwin Nunez lét reka sig af velli gegn Crystal Palace í gærkvöldi. Darwin missti þá stjórn á skapi sínu og skallaði Joachim Andersen eftir að Daninn hafði ögrað Úrúgvæjanum. Jürgen segir að Darwin muni læra af þessu. 

,,Það var búin að vera ögrun í gangi en það er ekki nokkur vafi á því að viðbröðin voru röng. Það er ekki annað hægt en að viðurkenna að þetta var rautt spjald. Jú, hann mun læra af þessu. Því miður fær hann nokkra leiki til að draga lærdóm af þessu. Það er ekkert sniðugt og enn verra út af því hvernig staðan er hjá okkur. En það þýðir ekkert að fást um það."

Jürgen vísar þarna í að bannið, sem Darwin fær, komi á versta tíma þar sem margir leikmenn Liverpool eru frá leik. Framherjarnir Roberto Firmino og Diogo Jota eru til dæmis báðir meiddir. Jürgen sagði eftir leikinn að hann eigi eftir að ræða málið við Darwin.

,,Darwin gerði mistök og auðvitað ræðum við málið. En ekki að sinni."

Það er vonandi að Darwin láti ekki svona hegðun endurtaka sig. Þess má geta að þetta er í fyrsta sinn, á valdatíma Jürgen Klopp, sem leikmaður Liverpool fær rautt spjlad fyrir ofbeldislega framkomu!