Spáð í spilin

Síðasti leikur ársins er á Anfield þegar Brendan Rodgers kemur í heimsókn með Leicester City. Leikurinn hefst klukkan 20:00 föstudagskvöldið 30. desember.

Eftir góðan útisigur í fyrsta deildarleik eftir HM hlé fáum við nú loksins að sjá okkar menn á heimavelli í fyrsta sinn síðan 12. nóvember en þá vannst fínn 3-1 sigur á Southampton. Baráttan heldur því áfram hjá liðinu að klífa upp töfluna eftir brösótt tímabil. Bjartsýnin er töluverð og ekki skemmir fyrir að einn mest spennandi leikmaður HM, Cody Gakpo, hefur verið keyptur. Hann verður þó ekki gjaldgengur fyrr en á nýju ári og helst er rætt um að bikarleikur við Úlfana fyrstu helgina í janúar sé raunhæfur möguleiki fyrir frumraun hans á Englandi.

Jürgen Klopp tók sinn vanalega blaðamannafund fyrir leikinn í gær og fór þar yfir stöðu mála. Lítið hefur breyst meiðslalega séð frá síðasta leik og þeir Roberto Firmino, James Milner, Curtis Jones, Luis Díaz, Diogo Jota og Arthur Melo eru allir frá en Ibrahima Konaté er tiltækur á ný eftir HM frí og hefur æft vel alla vikuna. Hjá refunum í Leicester er töluvert um meiðsli líka og verða þeir án James Maddison, Dennis Praet, Ryan Bertrand, Jonny Evans, James Justin og Ricardo Pereira hvorki meira né minna. Talandi um brösótt tímabil þá hafa Leicester nú átt eitt slíkt það sem af er. Þeir náðu reyndar að lyfta sér úr fallsætum fyrir HM hléð eftir mjög erfiða byrjun en í síðasta leik töpuðu þeir 0-3 fyrir Newcastle á heimavelli. Þeir vilja því ólmir snúa á sigurbraut á ný þar sem ansi stutt er niður í fallsætin á ný.

Liðin mættust síðast á Anfield þann 10. febrúar á þessu ári þar sem okkar menn unnu 2-0 sigur með mörkum frá Diogo Jota. Við þurfum að fara ansi langt aftur til að finna Leicester sigur í deildinni á Anfield en það gerðist síðast 3. maí árið 2000 og heilt yfir eiga Leicester þrjá sigra af 16 leikjum liðanna í deildinni á Anfield, þrír leikir hafa endað jafnir og Liverpool eru með 10 sigra þar af þrjá í röð. Við vonum að sigurgangan haldi áfram.

Það er ekki ólíklegt að Klopp geri breytingar á byrjunarliðinu frá síðasta leik enda er stutt í næstu umferð gegn Brentford strax næsta mánudag, en það er þó ekki fyrr en á næsta ári samt. Við teljum líklegt að Konaté komi inn í vörnina fyrir Matip og svo gætu þeir Carvalho og Elliott byrjað á kostnað einhvers af Henderson, Thiago eða Oxlade-Chamberlain. Byrjunarliðs ágiskunin er á þessa leið: Alisson í marki. Vörnin verður skipuð þeim Alexander-Arnold, Konaté, van Dijk og Robertson. Á miðjunni verða Fabinho, Henderson og Elliott. Fremstu þrír verða svo Carvalho, Núnez og Salah.

Spáin að þessu sinni er sú að okkar menn efni til flugeldasýningar í kvöld og vinni 3-0 sigur. Árið verður semsagt endað með stæl og völvuspáin segir að Núnez skori eitt og Salah tvö.

Fróðleikur:

- Þeir Mohamed Salah og Roberto Firmino eru markahæstir okkar manna í deildinni til þessa með sjö mörk hvor.

- James Maddison er markahæstur hjá Leicester, einnig með sjö mörk.

- Liverpool sitja í 6. sæti með 25 stig eftir 15 leiki.

- Leicester eru í 13. sæti með 17 stig eftir 16 leiki.