Kenny hrósar Carra á tímamótum!

Jamie Carragher mun að öllum líkindum spila sinn 666. leik með Liverpool annað kvöld. Þar með verður hann annar leikjahæsti leikmaður í sögu Liverpool. Kenny Dalglish hrósar Jamie á þessum tímamótum.

,,Þetta er mikill heiður fyrir hann að verða annar leikjahæsti leikmaður Liverpool. Hann er búinn að vera hérna býsna lengi og vonandi á hann eftir að vera eitthvað lengur."

Jamie verður, með leikjunum 666, annar leikjahæsti leikmaður Liverpool á eftir goðsögninni Ian Callaghan.

,,Cally er goðsögn hérna. Ekki bara vegna þess hversu marga leiki hann spilaði heldur líka vegna þjónustu sinnar við félagið og þeirrar velgengni sem hann naut og átti þátt í. Hann var hérna þegar grunnurinn var lagður að félaginu með því sem Shanks gerði."

Þó Jamie Carragher hafi spilað lengi með Liverpool þá er hann nú ekki búinn að spila frá því Bill Shankly réði ríkjum á Anfield Road. Hann er þó búinn að vera lengi að og hann hefur leikið undir stjórn þeirra Roy Evans, Gerard Houllier, Rafael Benítez, Roy Hodgson og nú síðast Kenny Dalglish.

,,Carra náði því nú ekki alveg en hann er búinn að vera hérna hjá mörgum sem hafa stjórnað félaginu í gegnum tíðina og hann hefur þjónað þeim öllum eins og best má hugsa sér. Ég er viss um að það eru einhverjar mílur eftir í honum ennþá."

Kenny segir auðvitað að nokkrar mílur séu eftir í Jamie en Íslendingur myndi segja að einhverjir kílómetrar væru eftir í einhverjum sem um væri rætt!

Víst er að Jamie Carragher er hvergi af baki dottinn og hann á örugglega eftir að leika þó nokkuð marga leiki og hlaupa ótaldar mílur og eða kílómetra áður en hann hættir að spila með Liverpool.