Rífum okkur upp!

Liverpool hefur tapað þremur síðustu deildarleikjum sínum og Steven Gerrard, eins og aðrir tengdir Liverpool er ekki sáttur við stöðu mála! Hann segir að leikmenn Liverpool verði að taka ábyrgð á stöðu liðsins og rífa sig upp í grannaslagnum við Everton annað kvöld.   

,,Við leikmennirnir verðum að taka ábyrgð á því hvar við erum í deildinni. Það er ekki nógu gott fyrir félag eins og okkur að vera þarna sem við erum. Við verðum að ná meiri stöðugleika. Við þurfum að rífa okkur upp og það er ekki til betri leikur til þess en gegn Everton. Maður hlakkar alltaf til þessara leikja. Þetta er kvöldleikur og það verður magnað andrúmsloft á Anfield."
 
,,Það er mikilvægt fyrir leikmenn að standa sig og ná úrslitum fyrir stuðningsmennina. Það eru allir niðurdregnir eftir síðustu leiki en við viljum fá stuðningsmennina til að brosa aftur. Þetta er mikilvæg vika og við viljum fara með sigur í nesti í bikarleikinn gegn Stoke um næstu helgi."

Það er aðeins rétt rúmlega hálfur mánuður frá því Steven Gerrard tók við Deildarbikarnum á Wembley. Það var magnaður dagur og mikið var fagnað eftir sigurinn á Cardiff en Liverpool hefur ekki náð sigri frá því sunnudaginn þá. Steven segir frábært að hafa unnið Deildarbikarinn en sá gleðilegi áfangi sé nú að baki og stefna þurfi á ný markmið. 

,,Það var frábært afrek að vinna Deildarbikarinn. Allir sem tengjast félaginu glöddust innilega þegar bikarinn vannst og það með réttu. En sá áfangi er nú að baki og við verðum að gleyma honum. Við hugsuðum okkur að nota Deildarbikarsigurinn til að gera atlögu að fjórða sætinu en það hefur ekki gengið eftir og við erum búnir að tapa tveimur leikjum síðan. Við þurfum að koma deildarformi okkar snarlega í lag og reyna að komast á Wembley í F.A. bikarnum. Þess vegna er leikurinn við Stoke orðinn enn mikilvægari en hann var fyrir nokkrum vikum."

Vonandi taka félagar Steven Gerrard fyrirliða sinn á orðinu og ná almennilegum leik gegn Everton. Liverpool hefur aðeins unnið einn deildarleik hingað til á árinu en Everton hefur ekki tapað í síðustu níu leikjum. Leikmenn Liverpool þurfa að taka sig saman í andlitinu og annað dugar ekki þegar rimma á Mersy bökkum stendur fyrir dyrum!