Carra telur Steven Gerrard bestan!

Jamie Carragher telur að frammistaða Steven Gerrard í 3-0 sigrinum á Everton á þriðjudagskvöldið hafi undirstrikað að hann er einn besti leikmaður félagsins frá upphafi.

Steven Gerrard skoraði glæsta þrennu gegn erkifjendunum og bætti þar með enn einni rósinni í hnappagatið í þeim 576 leikjum sem hann hefur spilað fyrir félagið. Jamie dró ekki úr því þegar hann hrósaði vini sínum eftir framgöngu hans á móti Everton.

,,Vegna þess hvað hann hefur gert fyrir félagið vil ég meina að hann sé sá besti. Kenny Dalglish, Graeme Souness og Ian Rush spiluðu allir saman í frábæru liði. En þar sem knattspyrna er liðsíþrótt þá hefur það verið erfiðara fyrir Stevie vegna þess að hann hefur ekki alltaf spilað í frábærum liðum."

,,Fyrir mér stendur frammistaða hans í úrslitum FA bikarsins árið 2006 upp úr meira en frammistaða Ian Rush í FA bikarnum árið 1986. Steven Gerrard hefur svo reglulega skilað sínu í stórleikjunum eins og til dæmis í úrslitum Meistaradeildarinnar árið 2005."

,,Á árum áður var efsta deildin í ensku knattspyrnunni full af bestu leikmönnum Bretlandseyja en nú eru margir af bestu leikmönnum heims í Úrvalsdeildinni. Ég er handviss um að fólk mun ekki átta sig að fullu á því hvað Stevie var góður fyrr en hann hættir að spila.  Þetta hefur verið erfiðara fyrr hann á marga vegu vegna þess að þegar maður eyðir öllum sínum ferli hjá einu félagi sjá stuðningsmennirnir mann sem ungan leikmann, muna eftir öllum mistökum manns þegar maður var að öðlast reynslu og þegar maður nálgast endalok ferilsins þá spyrja þeir af hverju maður er ekki þessi sami leikmaður lengur.  Jafnvel bestu leikmenn Liverpool þurftu ekki að glíma við þetta því þeir komu til félagsins nánast fullskapaðir leikmenn og fóru áður en ferill þeirra nálgaðist endalokin."

,,Ég veit að það getur verið erfitt fyrir strák úr borginni að standa undir öllum væntingunum. Þetta hefur verið sérstaklega erfitt fyrir Stevie því hann hefur borið gríðarlega ábyrgð á herðum sér lengi.  Enginn af þeim leikmönnum sem hafa spilað með honum myndu mótmæla því að hann er sá besti sem félagið hefur alið af sér og ég vona að framkvæmdastjórarnir sem hafa verið hér muni ekki mótmæla þessu heldur."

Jamie bætir við. ,,Við vitum öll að hann er í hópi þeirra bestu hér, flestir telja hann þann besta eða þann næst besta á eftir Kenny Dalglish. En þegar maður lítur yfir listann yfir bestu leikmenn ensku knattspyrnunnar myndi ég segja að hann sé aðeins á eftir Bobby Charlton þegar kemur að bestu miðjumönnunum sem nokkurn tímann hafa verið uppi."

,,Maður myndi setja Charlton í fyrsta sætið. Ekki aðeins fyrir afrek hans með Manchester United heldur vegna Heimsmeistarakeppninnar 1966.  Þar fyrir aftan myndi maður nefna Graeme Souness, Alan Ball, Dave Mackay, Paul Scholes, Roy Keane, Glenn Hoddle, Gazza, Frank Lampard og Bryan Robson.  Fyrir mér er Stevie betri en allir þessir fyrir það sem hann hefur gert með Liverpool og enska landslðinu."

Carra telur einnig að Steven Gerrard ætti að vera gerður að fyrirliða Englendinga fyrir Evrópumótið í sumar.  Scott Parker, leikmaður Tottenham, var gerður að fyrirliða enskra af Stuart Pearce fyrir vináttuleikinn við Holland fyrir nokkrum vikum síðan.

,,Scott Parker er frábær leikmaður og allir bera virðingu fyrir honum  en Steven Gerrard ætti að vera fyrirliði enska landsliðsins.  Hann var fyrirliði í Heimsmeistarakeppninni, hefur verið einn besti leikmaður landsliðsins í tíu ár og það þarf ekkert að ræða þetta frekar að mínu mati."