Naut hverrar mínútu

Hinn 19 ára gamli Conor Coady lék sinn fyrsta leik með Liverpool í Moskvu í gærkvöldi. Hann segist þrátt fyrir tap hafa notið hverrar mínútu í frumraun sinni.

,,Þetta var alveg frábært og ég naut hverrar mínútu. Þetta var merkilegt kvöld fyrir mig og fjölskylduna mína. Alla stráka dreymir um að spila með Liverpool. Maður þarf að vera þolinmóður, bíða átekta og æfa vel. Ég er búinn að bíða lengi eftir þessum degi og það fylgdi því einstök tilfinning að fara þangað og spila."

,,Ég lagði mig allan fram og ég var rosalega ánægður með að spila fyrsta leikinn minn. Ég var ánægður með hvernig ég spilaði og mér fannst allir strákarnir standa sig vel. Vonandi á ég eftir að spila marga leiki."

Conor er síðastur í röð ungra pilta sem Brendan Rodgers hefur gefið tækifæri á að spila með Liverpool það sem af er leiktíðar. Hann er þar með kominn í hóp með Adam Morgan, Andre Wisdom, Suso og Jerome Sinclair  sem allir hafa þreytt frumraunir sínar með Liverpool núna í haust. Conor er mjög ánægður með þá trú sem Brendan hefur sýnt honum og öðrum uppöldum Liverpool piltum.

,,Það er frábært að spila undir stjórn Brendan. Hann hefur leyft mörgum af okkur ungu strákunum að spila á leiktíðinni og það er magnað að hann hafi svona mikla trú á okkur."

Það kemur ekki á óvart að Conor Coady hafi nú fengið tækifæri í aðalliði Liverpool. Hann hefur síðustu ár verið talinn einn efnilegasti leikmaður Liverpool og jafnvel sá allra efnilegasti. Hann er öflugur miðjumaður og hefur verið af sumum verið líkt við Steven Gerrard. Hann hefur leikið með yngri landsliðum Englands. Conor lék mjög vel á móti Anzhi og hver veit nema hann eigi eftir að verða fastamaður í liði Liverpool þegar fram líða stundir.