Ótrúlegt kvöld!

Andy Carroll opnaði markareikning sinn fyrir Liverpool gegn Manchester City með tveimur fallegum mörkum í glæstum 3:0 sigri. Hann segir kvöldið hafa verið ótrúlegt og leikurinn lofi góðu fyrir næsta keppnistímabil. 

,,Þetta var ótrúlegt. Strákarnir spiluðu allir vel og svo náði ég að skora mörkin sem ég hef verið að bíða eftir. Ég er hérna til að skora mörk þó það mikilvægasta hafi verið að vinna leikinn og ná þremur stigum."

,,Við erum núna að byggja upp lið. Ég og Luis eru nýir hérna. Flanno lék sinn fyrsta leik í vörninni og mér fannst hann standa sig frábærlega. Þetta sýnir hvað við getum gert á næsta keppnistímabili. Það hefði verið gaman að skora hat-trick en eins og ég sagði þá skipti mestu að ná stigunum þremur."
 
Andy Carroll var skiljanlega ánægður með að skora fyrstu mörk sín fyrir Liverpool. En Kenny Dalglish sem keypti Andy í janúar var ekki síður ánægður með að sjá strákinn skora. Hann er líka kátur með að sjá samvinnu nýju sóknarmanna sinna. 

,,Það var frábært að sjá þann stóra komast á blað. Fyrra markið var frábært skot og það seinna góður skalli. Það má vel sjá að þeir Andy og Luis ná æ betur saman. Mér fannst Luis sýna framúrskarandi leik og hann var óheppinn að ná ekki að skora þegar hann átti skot í stöng. Liðið lék frábærlega og verðskuldaði fyllilega að vinna 3:0."

Eins og fram kom þá skoraði Andy Carroll sín fyrstu mörk fyrir Liverpool í leiknum gegn Manchester City. Hann skoraði síðast í deildinni í lok síðasta árs fyrir Newcastle United og þá einmitt á móti Manchester City!