Tap gegn Rangers í Glasgow

Það voru heimamenn í Rangers sem skoruðu eina markið í æfingaleiknum við Liverpool í kvöld. Þrír leikmenn Liverpool, Daniel Agger, Fabio Aurelio og Glen Johnson, komu aftur eftir meiðsli og nokkrir sem lítið hafa leikið hingað til í haust fengu færi á að liðka sig. Líklega var þetta það besta frá sjónarhóli Liverpool sem sýndi slakan leik.

Liverpool hefði getað komist yfir alveg í byrjun en Andy Carroll hitti ekki markið eftir góða sendingu frá Maxi Rodriguez. Heimamenn voru annars sterkari í fyrri hálfleik og komust yfir á 20. mínútu. Lee McCulloch skoraði þá rétt utan markteigs eftir horn. Fabio Aurelio hefði átt að bjarga á línu en boltinn fór framhjá honum við stöngina þar sem hann stóð. Það var þó Alexander Doni að þakka að Rangers hafði ekki stærri forystu í hálfleik en hann varði tvívegis vel.

Seinni hálfleikurinn byrjaði ekki vel fyrir brasilíska markmanninn. Kyle Lafferty átti þá fast skot sem fór í innanverða stöngina og Alexander rétt náði boltanum áður en hann fór yfir marklínuna. Hann kveinkaði sér eftir markvörsluna og í ljós kom að fingur hafði farið úr lið. Honum var kippt í liðinn en Daninn Martin Hansen varð að koma í markið.
 
Ekki löngu seinna náði Maxi boltanum og átti gott hlaup inn í vítateiginn en í stað þess að skjóta sjálfur þá reyndi hann að senda á Andy en vörn Rangers sá við því. Maxi hefði átt að skjóta sjálfur. Kyle átti, hinu megin, laglega tilraun en boltinn datt ofan á þverslána þegar hann reyndi að vippa yfir Martin. 

Liverpool lék betur á lokakaflanum þegar sterkari menn liðsins voru komnir inn á. Andy skallaði rétt framhjá eftir horn og Stewart Downing komst í færi í vítateignum en skot hans var varið. Ekki var meira skorað og heimamenn unnu sanngjarnan sigur. 

Liverpool: Doni (Hansen 57. mín.), Johnson (Flanagan 66. mín.), Wilson (Enrique 78. mín.), Coates, Agger (Skrtel 78. mín.), Spearing, Leiva (Adam 66. mín.), Rodriguez (Henderson 78. mín.), Aurelio (Kuyt 65. mín.), Carroll og Bellamy (Downing 66. mín.). Ónotaður varamaður: Reina.

Áhorfendur á Ibrox: 27.453.
 
Aðeins þrír leikmenn Liverpool léku allan leikinn. Þeir Danny Wilson og Charlie Adam léku á sínum gamla heimavelli og fengu góðar viðtökur. Það var á hinn bóginn baulað á Craig Bellamy enda lék hann um tíma hjá Celtic!