Við höfum nægan tíma

Simon Mignolet segir að þreyta verði ekki vandamál þegar Liverpool mætir Manchester United á sunnudaginn kemur.  Hann telur að leikurinn muni leggja stórt innlegg í reynslubankann hjá sér.


Leikurinn við Notts County fór í framlengingu en það er eitthvað sem fáir bjuggust við, en að lokum vannst 4-2 sigur.

Þrátt fyrir að hafa spilað í tvo klukkutíma á þriðjudagskvöldið telur Mignolet að leikmenn hafi nægan tíma til að jafna sig fyrir leikinn um helgina.

,,Við erum atvinnumenn sem leggjum hart að okkur á undirbúningstímabilinu til þess að vera klárir í byrjun tímabilsins þannig að þetta verður ekki neitt vandamál," sagði markvörðurinn í viðtali við Liverpool Echo.

,,Allir munu hvíla sig og það eru enn nokkrir dagar þangað til að sunnudagur rennur upp.  Það er nægur tími til að jafna sig.  Þetta verður gríðarlega mikil reynsla fyrir mig að mæta United og ég hlakka alltaf til þessara leikja.  Þetta verður stórleikur og við munum að sjálfsögðu reyna að vinna hann.  Við pössum uppá að allir séu klárir á sunnudaginn. Við verðum að hugsa um okkur sjálfa frekar en að einbeita okkur að því hver mótherjinn er."

Í leiknum gegn Notts County komst liðið í 2-0 með mörkum frá Raheem Sterling og Daniel Sturridge.  Gestirnir gáfust ekki upp og jöfnuðu með mörkum frá Yoann Arquin og Adam Coombes og framlengja þurfti leikinn eins og áður sagði.  Ástandið versnaði svo enn frekar þegar Kolo Toure þurfti að fara meiddur af velli og allar innáskiptingar Brendan Rodgers voru búnar.  Því þurftu leikmenn að leika einum færri það sem eftir lifði leiks en Daniel Sturridge og Jordan Henderson sáu til þess að ekki þurfti að grípa til vítaspyrnukeppni er þeir skoruðu í sitthvorum hálfleik framlengingar.

,,Okkur er létt að hafa unnið leikinn," sagði Mignolet.  ,,Við vildum komast áfram í næstu umferð og það tókst.  Augljóslega heldur maður að hlutirnir verði aðeins auðveldari eftir að hafa komist í 2-0 en sú varð ekki raunin í gærkvöldi.  Það var ekki gott og sömuleiðis meiðslin sem við urðum fyrir."

,,Við gerðum okkur sjálfum erfitt fyrir í seinni hálfleik.  Ég myndi ekki kalla þetta vanmat en þegar maður leiðir 2-0, skiptir engu hver mótherjinn er því leikurinn er ekki búinn.  Við reyndum að skora þriðja markið en það tókst ekki og þeir skoruðu svo mark eftir fast leikatriði sem breytti leiknum.  Við verðum að læra af þessu en við erum komnir áfram og það er það sem skiptir máli.  Við viljum gera vel í þessari keppni og kannski munum við horfa til baka jákvæðum augum á þennan leik síðar meir. Við eigum enn möguleika á því að vinna þennan bikar.  Á tímabili í leiknum leit út fyrir að sá möguleiki væri ekki fyrir hendi lengur."

Eins og áður sagði meiddist Kolo Toure í leiknum og Brendan Rodgers sagði að meiðslin litu ekki vel út.  Mignolet segir að liðið hafi engu að síður góða leikmenn til að koma inn í staðinn.

,,Það væri mikið áfall að missa Kolo," sagði hann.  ,,Við verðum bara að bíða og sjá hversu slæmt þetta er.  Það er alltaf leiðinlegt að missa menn í meiðsli en aftur á móti erum við með sterkan leikmannahóp sem getur tekist á við þetta.  Ég hef ekki áhyggjur af þessu.  Við eigum leikmenn sem koma inní þetta ef Kolo er meiddur lengi."