Lallana getur gert 20-30% betur

Jürgen Klopp var ánægður með margt af því sem hann sá í leiknum gegn Tottenham. Hann vill þó fá ennþá meira út úr einstökum leikmönnum.

Leikmenn Liverpool voru greinilega tilbúnir til að leggja mikið á sig strax í fyrsta leik undir stjórn Klopp. Tölfræði frá SKY sýnir að okkar menn hlupu samtals 116 kílómetra í leiknum og tóku 614 spretti. Það er talsvert meiri vinna en menn lögðu á sig í síðasta leik, en þá hljóp liðið 106 kílómetra og tók 458 sprett.

Það kemur ekki á óvart að James Milner puðaði manna mest. Samtals hljóp hann 13,1 kílómetra og tók 82 spretti.

„Milner er maskína. Mjög heilsteyptur leikmaður og hrikalega duglegur. Hann hefur allt", segir Klopp, ánægður með frammistöðu fyrirliðans.

Klopp er ánægður með margt sem hann sá en viðurkennir að liðið þurfi að spila betur ef árangur á að nást. Hann er fullviss um að liðið muni bæta sig heilmikið á næstunni.

„Það þarf ekkert að strá einhverju töfradufti yfir þessa leikmenn til þess að þeir verði betri. Þetta eru góðir leikmenn, það þarf bara að fínpússa nokkur atriði. Coutinho getur spilað betur, við vitum það. Lucas á að geta dreift boltanum jafnt til hægri og vinstri, Can mun læra að meta hvort það er betra að taka hlaup eða losa sig við boltann. Hann er ungur og á eftir að læra ýmislegt."

„Sjáiði t.d. Adam Lallana. Ég veit ekki hvort þið hafið séð marga svona leiki frá honum, en hann hljóp og barðist á fullu allan tímann. Hann er samt það hæfileikaríkur leikmaður að ég veit að henn getur verið 20-30% betri, við réttar aðstæður. Þannig aðstæður þurfum við að hjálpast að við að skapa. Það er fullt af hæfileikum hérna, við þurfum bara að ná aðeins meira út úr hverjum og einum og vinna aðeins betur saman. Við hjálpumst að við að gera það, í rólegheitunum. Reynum aftur og aftur þar til við verðum betri."