Flanagan lánaður til Burnley

Þann 5. ágúst síðastliðinn var staðfest að bakvörðurinn Jon Flanagan hafi verið lánaður til nýliðanna í úrvalsdeildinni, Burnley, allt næsta tímbil.



Flanagan sem er 23 ára og uppalinn hjá félaginu sneri til baka eftir erfið meiðsli á síðasta tímabili, nánar tiltekið í janúar síðastliðnum.  Hann hefur spilað 50 leiki fyrir aðallið félagsins og skorað í þeim eitt mark.

Stjóri Burnley, Sean Dyche, hefur sagt að Flanagan þurfi að komast í betra stand áður en hann geti hafið leik með liðinu og því er ekki búist við því að hann spili með Burnley gegn Swansea í fyrsta leik tímabilsins um næstu helgi.  Burnley mæta svo Liverpool í næsta leik og ljóst að Flanagan má ekki spila þann leik.  Hann gæti því klæðst búningi liðsins í fyrsta sinn í deildinni gegn Chelsea þann 27. ágúst.