Dominic Solanke kjörinn sá besti!

Dominic Solanke, sem verður opinberlega leikmaður Liverpool í næsta mánuði var kjörinn besti leikmaðurinn á Heimsmeistaramóti undir 20 ára sem lauk í Suður Kóreu í gær. Hann skoraði fjögur mörk á mótinu og varð næstmarkahæstur leikmanna. 

Dominic er í góðum félagsskap leikmanna sem hafa verið kosnir bestu leikmenn þessarar keppni í gegnum tíðina. Hér er listi yfir þá sem hafa verið kosnir þeir bestu á þessari öld. Sumir hafa náð langt og orðið meðal þeirra bestu en aðrir ekki. Þessi keppni var fyrst haldin 1977. Árið 1979 fékk Diego Maradona Gullboltann eins og verðlaunin heita sem besti leikmaðurinn fær. 

2001 Javier Saviola Argentínu

2003 Ismail Matar Sameinuðu arabísku furstadæmunum

2005 Lionel Messi Argentínu

2007 Sergio Agüero Argentínu

2009 Dominic Adiyiah Gana

2011 Henrique Almeida Brasilíu

2013 Paul Pogba Frakklandi

2015 Adama Traoré Malí

2017  Dominic Solanke Englandi

Dominic hefur leikið með öllum yngri landliðum Englands frá undir 16 og skorað fyrir þau öll nema undir 21. Mest 11 mörk fyrir undir 17 ára liðið. Dominic var í lið Englands sem varð Evrópumeistari undir 17 ára 2014. Hann deildi þá markakóngtitli mótsins með fjögur mörk. Hann skoraði í úrslitaleik mótsins gegn Hollandi sem lauk 1:1. England vann svo í vítaspyrnukeppni. Árið 2014 var hann kosinn besti ungi landsliðsmaður Englands. 

Dominic hefur tvívegis, 2014 og 2015, unnið Unglingabikarinn með Chelsea. Vonandi verður hann góður í liði Liverpool en það er engin trygging fyrir því að svo verði.