Skoraði og lagði upp mark

Harry Wilson var í eldlínunni með landsliði Wales fyrr í dag þegar þeir mættu Kína í æfingaleik.  Wilson byrjaði leikinn á 21. afmælisdegi sínum, skoraði mark og lagði upp eitt í 0-6 sigri.


Wilson er á láni hjá Hull City sem spila í næst efstu deild Englands og þar hefur hann staðið sig mjög vel.  Mark hans í leiknum í dag kom undir lok fyrri hálfleiks þegar hann vann boltann á miðjunni, fékk sendingu innfyrir á vítateiginn og skaut hnitmiðuðu skoti upp í fjærhornið.  Virkilega vel gert !

Þetta var annar landsleikur Wilson og má væntanlega segja að hann hafi stimplað sig vel inn í plön nýs landsliðsþjálfara Wales, Ryan Giggs.  Hann lagði svo upp fimmta mark liðs síns í leiknum þegar hann átti góða sendingu inn á Sam Vokes sem kláraði færi sitt vel.  Wilson var svo skipt útaf þegar um 20 mínútur voru eftir.

Ben Woodburn sat á varamannabekknum en var skipt inná fyrir Gareth Bale þegar um hálftími var eftir af leiknum.  Bale skoraði þrennu í leiknum og varð þar með markahæstur í sögu landsliðs Walesverja, en sá sem átti metið áður var auðvitað Ian Rush.

Leikurinn var hluti af fjögurra liða æfingamóti og mæta Wales annaðhvort Úrúgvæ eða Tékklandi í úrslitaleik mótsins á mánudaginn kemur.