Spáð í spilin

Fyrsti leikur desembermánaðar er stórleikur hjá okkar mönnum þegar Everton skjótast yfir á Anfield. Leikurinn hefst klukkan 16:15 sunnudaginn 2. desember.

Jürgen Klopp þarf væntanlega ekki að halda neina eldmessu til þess að mótivera sína leikmenn fyrir þennan leik og menn vilja klárlega bæta fyrir frekar slaka frammistöðu gegn PSG á miðvikudagskvöldið. Fyrirliðinn Jordan Henderson er í banni í leiknum og því er ljóst að breytingar verða gerðar á byrjunarliðinu. Stuðningsmenn voru heldur betur ekki ánægðir með miðjuna gegn PSG þar sem þeir Henderson, Milner og Wijnaldum komust ekki í takt við leikinn á neinn hátt. Það er hinsvegar erfitt að segja hver tekur sæti Henderson í liðinu sem og hvort þeir Milner og Wijnaldum haldi sínum sætum. Hvað vörnina varðar býst ég við því að Trent Alexander-Arnold komi inn í bakvarðastöðuna og þá er spurning hvort að Joe Gomez fari ekki við hlið van Dijk í miðverðinum. Naby Keita kom inná gegn PSG, sýndi ágæta takta og þarf að fara að koma sér í gang hjá félaginu. Ég tippa á að hann komi inn og að það verði eina breytingin á miðjunni, held að Klopp vilji ekki setja Shaqiri inn þar sem miðjan verður þá kannski of sóknarsinnuð. Meiðslalistinn er fámennur eins og yfirleitt hefur verið á þessu tímabili, sem er vel. En þeir Lallana, Origi og Solanke eru skráðir þar þegar þetta er skrifað (ásamt auðvitað Alex Oxlade-Chamberlain), Origi er reyndar ekki meiddur heldur glímir við veikindi. Staðan á Lallana verður skoðuð rétt fyrir leik en ég geri ráð fyrir því að hann verði í allra mesta lagi á bekknum.

Nágrannarnir hafa verið á góðu skriði undanfarið, hafa unnið þrjá af síðustu fimm leikjum sínum í deildinni og þar hefur Gylfi Sigurðsson farið fremstur í flokki. Gylfi hefur í gegnum tíðina skorað nokkur mörk gegn Liverpool og ég verð að segja að þetta er bara komið gott í bili og vonandi setur hann ekki boltann í netið á Anfield. Reyndar var það huggun harmi gegn síðast þegar Gylfi skoraði á Anfield að Liverpool vann leikinn með marki frá van Dijk, lokatölur 2-1 í 3. umferð ensku bikarkeppninnar. Það er síðasti leikur liðanna á Anfield en liðin mættust þar síðast í deildinni í desember í fyrra þar sem gestirnir náðu 1-1 jafntefli. Mark þeirra var af ódýrari gerðinni en umdeild vítaspyrna var dæmd og úr henni skoraði Wayne Rooney. Fyrr í leiknum hafði Mohamed Salah skorað frábært mark. Það er svo skemmst frá því að segja að enginn leikmaður Everton er á meiddur og þeir hafa því úr öllum sínum leikmönnum að velja.


Klopp sagði á blaðamannafundi fyrir leikinn að þetta væri besta Everton liðið sem hann hefur mætt síðan hann tók við stjórn Liverpool. Leikmenn Everton hafa svo verið duglegir að koma fram í fjölmiðlum í vikunni og segja að nú sé heldur betur kominn tími til að vinna Liverpool á þeirra eigin heimavelli. Það gerðist síðast á síðustu öld, nánar tiltekið 27. september árið 1999. Síðan þá hafa 18 deildarleikir farið fram á Anfield og hafa níu endað með jafntefli og Liverpool unnið jafnmarga. Everton hafa heldur ekki unnið Liverpool síðan 17. október árið 2010 og nú finnst bláliðum vera kominn tími til að vinna sigur, skiljanlega svosem en verkefnið er ekki auðvelt þar sem okkar menn eru jú taplausir enn sem komið er í deildinni. Það væri hrein hörmung ef fyrsta tap deildarinnar kæmi gegn þeim !

Spáin að þessu sinni er sú að Liverpool vinnur 2-1 sigur og varla þarf að taka það fram að þetta verður hörkuleikur. Kryddum þetta aðeins og segjum að gestirnir skori fyrst, Gylfi verður þar ekki að verki en það kæmi reyndar ekki á óvart ef hann myndi leggja markið upp. Liverpool snýr blaðinu við og fögnuðurinn í leikslok verður gríðarlegur.

Fróðleikur:

- Mohamed Salah er markahæstur leikmanna félagsins með níu mörk í öllum keppnum, þar af sjö í deildinni.

- Þeir Gylfi og Richarlison eru markahæstir Everton manna, báðir með sex mörk í deildinni.

- Liverpool sitja í 2. sæti deildarinnar með 33 stig eftir 13 leiki.

- Everton eru í því sjötta með 22 stig.