Spáð í spilin

Dejan Lovren er eitthvað slappur og fór ekki með til Portúgal, en að öðru leyti fóru allir sem vettlingi geta valdið með, nema Oxlade-Chamberlain. 

Það er auðvitað algjörlega ómögulegt að geta sér til um byrjunarliðið sem Klopp kýs að treysta á, en ég held að hann taki allavega ekki marga sjénsa á að hvíla menn jafnvel þótt það kunni að vera freistandi. Alveg sama hvað menn segja út á við, þá er Úrvalsdeildin alveg örugglega algjört forgangsatriði hjá öllum hjá Liverpool. Allavega okkur stuðningsmönnunum sem erum búnir að bíða í 29 ár. En það er ekki þar með sagt að menn sú tilbúnir að taka of mikla sjénsa. Aukinheldur getur líka verið stórhættulegt fyrir Klopp að vera of varkár og passífur því liðið er á góðu skriði og mikilvægt að halda stemningunni allt til enda. 

Gary Lineker benti réttilega á það um helgina að það væri galið að ensku liðin væru að leika stórleiki í deildinni á sunnudegi fyrir 8 liða úrslit í Meistaradeildinni. Það er vissulega hægt að taka undir það, en svona er þetta bara. Það eru fjórir leikir - ég endurtek; FJÓRIR LEIKIR eftir í deildinni og vonandi tveir leikir í Meistaradeildinni næstu fjórar vikurnar. Við höfum farið í gegnum fáránlegra leikjaprógramm en það. Leikmenn okkar eru í góðu formi og velgengnin í vetur og vonin um að vinna loksins deildina gefur mönnum heilmikinn aukakraft.

Ég á þessvegna ekki von á því að Klopp geri margar breytingar á liðinu. Robertson var í banni í fyrri leiknum og kemur nokkuð örugglega inn aftur. Eins og áður segir er Lovren eitthvað slappur þannig að Matip verður væntanlega við hlið Van Dijk. 

Ég á frekar von á því að Klopp stilli upp varnarsinnaðri miðju, þannig að Keita verður væntanlega á bekknum. Ég giska á Milner, Fabinho og Wijnaldum. Mér finnst freistandi að hvíla einhvern af framherjunum þremur, en eins og ég segi þá finnst mér það ekkert sérstaklega líklegt. Það væri kannski helst að Mané fengi hvíldina. Salah er nokkurnveginn óstöðvandi í skyndisóknum og Firmino vinnur það góða varnarvinnu að ég býst við þeim báðum í byrjunarliðinu. 

Ég er eins og venjulega fremur svartsýnn. Ég spái 1-0 sigri Porto, en vona auðvitað að við verðum komnir með tveggja marka forystu snemma í leiknum svo hægt verði að gefa einhverjum lykilmönnum smá hvíld. 

Þess má svo geta í lokin að það hefur ekki gerst síðan 1965 að Liverpool tapi Evrópuviðureign þar sem tveggja marka sigur eða meira hefur unnist í fyrri leiknum. Vonandi breytist það ekki í bráð.

YNWA!