Ekki einu sinni sagan er með okkur í liði

Mér hefur verið tíðrætt um að sagan sé ansi oft með Liverpool í liði, en það hjálpi okkar auðvitað ekki neitt. Fyrir morgundaginn er staðan samt þannig að ekki einu sinni sagan er á okkar bandi. 
Mér hefur líka verið tíðrætt um það í vetur að ég ætli að trúa því fram til síðustu sekúndu að við getum unnið deildina. Ég stend við það. Það er eitthvað í loftinu, vatninu eða bara eitthvað. Það er alveg magnað hversu margt hefur fallið með okkur að undanförnu. Afhverju ætti það ekki alveg eins að gerast á morgun? 

Sagan segir samt mjög einfaldlega að það sé með öllu ómögulegt. Frá því að Úrvalsdeildin var stofnuð hafa úrslitin í deildinni nefnilega 7 sinnum ráðist í lokaumferðinni og í hvert einasta skipti hefur liðið sem var á toppnum eftir 37 umferðir staðið uppi sem sigurvegari. Það er ömurleg tölfræði, en við munum vonandi breyta henni á morgun.
 

Fyrir lokadaginn var Blackburn með tveggja stiga forystu á United, en tapaði 2-1 fyrir Liverpool á Anfield. Sigurmarkið skoraði Jamie Redknapp beint úr aukaspyrnu á 90. mínútu. Fréttirnar af óvæntu tapi Blackburn bárust á Upton Park þar sem leikur United og West Ham var um það bil að fjara út og þrátt fyrir stórsókn United síðustu andartökin endaði sá leikur 1-1. Hvort tveggja frekar óvænt úrslit og okkar maður, King Kenny, slapp sannarlega með skrekkinn. 
Fyrir síðustu umferðina leiktíðina 2007-2008 var Manchester United enn eina ferðina í harðri baráttu, í þetta sinn við Chelsea. Eftir 37 umferðir voru liðin jöfn með 84 stig, en United var með miklu betra markahlutfall þannig að sigur gegn Wigan í lokaleiknum dugði lærisveinum Ferguson. Þeir stóðust álagið eins og oft áður og unnu sinn leik 0-2, en Chelsea gerði 1-1 jafntefli við Wigan.
Nokkrum dögum síðar var Avram Grant rekinn frá Chelsea. Annað sætið í deildinni og tap í vítakeppni í úrslitaleik Meistaradeildarinnar (eftir sigur gegn Liverpool í undanúrslitum eftir framlengingu á Brúnni) þótti óviðunandi árangur. 

Leiktíðina 2009-2010 voru Chelsea og Manchester United aftur í baráttu, United var stigi á eftir Chelsea frá 35. umferð og allt til loka. Bæði lið unnu fjóra síðustu leiki sína nokkuð örugglega og eins og til að undirstrika yfirburði liðanna í deildinni skoruðu þau samtals 12 mörk síðasta daginn! United lagði Sunderland 4-0 á útivelli og Chelsea rótburstaði Wigan 8-0 á Brúnni. 

Vorið 2012 var Manchester United aðeins nokkrum ótrúlegum augnablikum frá því að endurskrifa söguna, með því að vinna deildina þrátt fyrir að vera í 2. sæti fyrir lokadaginn - á markamun reyndar. Þetta tímabil háðu Manchester liðin æsispennandi einvígi og eftir 90 mínútur af lokaumferðinni leit allt út fyrir að United hefði betur, en liðið var þá búið að tryggja sér 2-1 sigur á Sunderland og City var 1-2 undir á móti QPR. Á ótrúlegan hátt náðu Dzeko og Aguero að skora tvö mörk í uppbótartíma og tryggja City sigur í deildinni. 

Eins og við munum væntanlega öll var Liverpool í dauðafæri á að vinna deildina undir lok tímabilsins 2013-2014. Í lokaumferðinni var vonin hinsvegar orðin álíka veik og hún er í dag. Liðið var tveimur stigum á eftir Manchester City og varð að treysta á óvænt úrslit í leik City og West Ham. Það gerðist ekki, bæði Liverpool og City unnu sína leiki og City stóð uppi sem sigurvegari. 

Það sést á þessari upptalningu að von okkar er veik, að minnsta kosti sögulega séð. Og kannski á allan hátt. En það er allavega ekkert annað í stöðunni en að halda áfram að láta sig dreyma. Liðið okkar er stórkostlegt og hver veit, hver veit....................Ég trúi.