Spáð í spilin

Næsti leikur er gegn botnliði Watford á Anfield. Þetta er fyrsti leikur 17. umferðar og hefst hann klukkan 12:30 laugardaginn 14. desember.

Næstu sjö daga leika okkar menn alls fjóra leiki og byrjar fjörið semsagt í dag þegar lánlausir Watford mæta á svæðið. Á þriðjudaginn er svo deildarbikarleikur á útivelli gegn Aston Villa og þar má nú búast við því að fjölmargir ungliðar fái tækifæri þar sem aðalliðið verður farið til Katar. Á miðvikudaginn verður semsagt undanúrslitaleikur í HM félagsliða og laugardaginn 21. spilar liðið svo annaðhvort úrslitaleik eða leik um þriðja sætið í keppninni.

Með þetta í huga má nú alveg búast við því að Jürgen Klopp hugi að mannabreytingum í byrjunarliðinu. Þeir leikmenn sem hafa komið inn að undanförnu og spilað lítið það sem af er hafa sem betur fer komið hungraðir inn og staðið sig með prýði. Watford eru þó nýbúnir að skipta um stjóra og því gæti verið varasamt að gera of miklar breytingar. Eitt er þó víst að miðvarðaparið verður skipað þeim Virgil van Dijk og Joe Gomez þar sem Joel Matip og Dejan Lovren eru meiddir. Það þýðir þá einnig væntanlega það að Alexander-Arnold og Andy Robertson verði í bakvarðastöðunum og Alisson verður auðvitað fyrir aftan þessa fjóra. Miðjan er svo alltaf spurningamerki en það kæmi ekki á óvart ef Oxlade-Chamberlain og James Milner fái tækifæri. Frammi gætu svo Divock Origi og Xerdan Shaqiri verið inní myndinni einnig. Adam Lallana er samkvæmt nýjustu fréttum eitthvað tæpur og sem fyrr eru Fabinho og Nathaniel Clyne meiddir.

Watford glíma við töluverð meiðsli í sínum leikmannahóp einnig en alls eru átta leikmenn á sjúkralistanum. Reyndar eru fimm leikmenn af þessum átta sem gætu mögulega verið með á Anfield en staðan á þeim Adam Masina, Roberto Pereyra, Sebastian Prödl, Daryl Janmaat og Craig Dawson verður tekin eins seint og hægt er á meðan þeir Danny Welbeck, Tom Cleverley og Jose Holebas eru allir frá. Eins og áður sagði eru Watford með nýjan stjóra, Nigel Pearson sem áður stýrði Leicester City meðal annars. Liðið er því að einhverju leyti óskrifað blað og hafði Klopp það á orði á blaðamannafundi fyrir leikinn að hann gæti alveg eins hent skýrslunni um leikgreiningu Watford í ruslið nú þegar nýr stjóri er mættur.

Þrátt fyrir þá staðreynd að Watford séu með nýjan stjóra og gætu komið á óvart hef ég nú ekki mikla trú á því að þeir vinni sigur í þessum leik. Þeir hafa ekki staðið sig vel á Anfield undanfarin ár, síðustu tveir leikir þeirra þar hafa endað með 5-0 tapi og eini sigurleikur þeirra kom árið 1999, síðan þá hafa fimm leikir tapast með markatölunni 18-1 ! Sagan hjálpar Liverpool auðvitað ekkert í leiknum en styrkleikamunur liðanna á tímabilinu er bara of mikill til þess að það sé líklegt að þeir geri betur en heimamenn í þessum leik.

Spáin að þessu sinni er sú að það tekst að halda hreinu í þriðja leiknum í röð og okkar menn skora fjögur mörk hinumegin. Lokatölur 4-0 og allir kátir í síðasta heimaleik liðsins fyrir jól.

Fróðleikur:

- Sadio Mané er sem fyrr markahæstur leikmanna liðsins á tímabilinu með níu mörk í deildinni.

- Gerard Deulofeu er markahæstur hjá Watford með tvö mörk á tímabilinu.

- Gini Wijnaldum gæti spilað deildarleik númer 120 fyrir Liverpool.

- Okkar menn sitja á toppi deildarinnar með 46 stig eftir 16 leiki.

- Watford eru í botnsæti deildarinnar með níu stig.