Spáð í spilin

Næsti leikur okkar manna er gegn fallbaráttuliði Watford á útivelli. Leikurinn hefst klukkan 17:30 í dag, laugardaginn 29. febrúar.

Það er ekki oft sem deildarleikur hittir á hlaupársdag eins og nú og heilt yfir hefur liðið leikið sjö leiki á þessum degi í sögunni. Síðast gerðist það árið 2004 þegar Leeds voru heimsóttir á Elland Road og enduðu leikar 2-2. Harry Kewell skoraði gegn sínum gömlu félögum og Milan Baros skoraði hitt markið. Aðeins einn leikur af þessum sjö vannst, á því herrans ári 1908, 3-1 gegn Bristol City.

Öldin er svo sannarlega önnur nú og Jürgen Klopp er ekki mikið fyrir það að láta söguna hafa áhrif á sig. Hann veit þó sem er að leikurinn í dag verður erfiður enda Watford í fallbaráttu eins og áður sagði og auk þess á heimavelli. Klopp sagði á blaðamannafundi fyrir leikinn að þó svo að úrslit Watford hafi ekki verið góð undanfarið hafi liðið spilað vel og oft átt meira skilið út úr leikjum sínum. Við þurfum svo bara að horfa aftur til mánudagskvöldsins síðasta til að sjá að lið í fallbaráttu berjast eins og ljón fyrir þeim stigum sem eru í boði. Eins og venjulega fór Klopp yfir stöðu leikmanna sem eru meiddir og sem fyrr eru þeir Xerdan Shaqiri og Nathaniel Clyne ekki tiltækir. James Milner og Jordan Henderson eru byrjaðir að hlaupa á ný en verða ekki klárir fyrr en í fyrsta lagi í næstu viku, mögulega í bikarleiknum gegn Chelsea. Hjá heimamönnum eru aðeins þeir Kiko Femenia og Daryl Janmaat á meiðslalistanum en báðir gætu verið með gegn Liverpool þannig að Nigel Pearson hefur úr öllum sínum leikmannahóp að velja.

Byrjunarlið Klopp verður að öllum líkindum lítið breytt frá síðasta leik en margir spá því að Naby Keita haldi ekki sæti sínu í liðinu á kostnað Alex Oxlade-Chamberlain, sem kom sterkur inn gegn West Ham. Það verður engu að síður að hafa í huga að á næstu vikum verður þétt spilað og fram til 21. mars spilar liðið sex leiki. En breytingar verða nú væntanlega meira í huga Klopp t.d. fyrir bikarleikinn við Chelsea í næstu viku. Liðsval Nigel Pearson hefur verið nokkuð stöðugt í undanförnum leikjum, hann stillir upp í 4-2-3-1 kerfi. Mögulega gæti hann freistast til þess að bæta við auka manni í vörnina til að verjast enn þéttar gegn okkar mönnum en við sjáum til með það. Við vitum sem er að lið mæta öllflest þannig til leiks í dag gegn Liverpool og vilja svo reyna að sækja nokkuð hratt upp til að eiga séns á að pota inn marki.

Ef við kíkjum aðeins aftur í sögubækurnar yfir leiki Liverpool á Vicarage Road má sjá að frá árinu 2000 hafa sex leikir verið spilaðir þar. Aðeins einn hefur tapast, enn hefur endað jafn og fjórir leikir unnist. Síðast mættust liðin á þessum velli 24. nóvember 2018. Niðurstaðan þar var 0-3 sigur og öll mörk okkar manna skoruð seint í leiknum.

Spáin að þessu sinni er sú að sigur vinnst í dag í baráttuleik. Lokatölur verða 1-3, vonir stuðningsmanna Watford kvikna um stund þegar þeir jafna 1-1 en Liverpool sýnir mátt sinn og megin og sigla góðum sigri í höfn.

Fróðleikur:

- Mohamed Salah er markahæstur Liverpool manna í deildinni með 15 mörk.

- Troy Deeney og Roberto Pereyra hafa skorað mest Watford manna eða fimm mörk hvor.

- Watford sitja í 19. sæti deildarinnar með 24 stig eftir 27 leiki.

- Liverpool eru í toppsætinu með 79 stig eftir 27 leiki.