Spáð í spilin

Sókn Liverpool að enska meistaratitilinum hefst síðdegis í dag! Það á nefnilega ekki að verja titilinn sem kom í hús í sumar heldur að sækja að því að verja hann. Jürgen Klopp sendi þessa yfirlýsingu frá sér og það verður unnið eftir henni.

Sókn Liverpool hefst á Anfield Road þegar Leeds United kemur í heimsókn. Sannkallaður meistaraslgur því Leeds komst loksins upp í efstu deild á síðustu leiktíð eftir mikla þrautagöngu. Svo merkilega vill til að þegar Liverpool varð Englandsmeistari vorið 1990 þá vann Leeds sér líka sæti í efstu deild! Sama gerðist núna 30 árum seinna. Leeds United féll svo úr efstu deild vorið 2004. Allt gekk á afturfótunum árum saman og liðið lenti meira að segja niður í þriðju deild. Það verður stór stund fyrir stuðningsmenn liðsins að sjá liðið sitt aftur meðal þeirra bestu. Liðið byrjar einmitt á móti besta liði Englands og heimsins! 


Leeds hefur keypt sterka menn í sumar og það má ljóst vera að allt verður gert til að koma í veg fyrir að liðið missi sæti sitt í efstu deild strax aftur. Nógu erfitt var að endurheimta það. Liverpool hefur á móti aðeins keypt einn leikmann og þykir mörgum stuðningsmönnum Liverpool það ekki nóg. Opið er fyrir félagaskipti fram í október og svo sjáum hvað setur hvað kaup og sölur varðar. Þó svo að margir sparkspekingar telji að Liverpool nái ekki að vinna deildina á þessu keppnistímabili þá vann liðið deildina með yfirburðum á síðasta keppnistímabili. Önnur félög hafa vissulega keypt marga leikmenn og styrkt liðshópa sína en þau lið þurfa að bæta sig mikið! Á móti kemur að Liverpool þarf að halda sínu striki og vel það!

Ég spái því að Liverpool hefji sóknina að meistaratitli númer 20 með 2:0 sigri á Leeds United. Leikurinn verður erfiður og Liverpool þarf að hafa verulega fyrir því að snúa Leeds niður. Naby Keita og Mohamed Salah skora mörkin sem færa Liverpool sigur!

YNWA!