Spáð í spilin

Síðasti leikur D-riðils í Meistaradeild er gegn Midtjylland á útivelli. Okkar menn hafa tryggt sér sigur í riðlinum og gefa vonandi lykilmönnum kærkomið frí frá keppni.

Jürgen Klopp sat fyrir svörum á blaðamannafundi daginn fyrir leik og sagði að engin ný meiðsli hefðu komið í ljós eftir leikinn við Úlfana en tók það jafnframt fram að enginn af þeim leikmönnum sem glíma við meiðsli nú þegar verði klárir í slaginn fyrir þennan leik. Alex Oxlade-Chamberlain er þó byrjaður að æfa að fullu á ný sem er gott en skiljanlega verður hann ekki klár í slaginn fyrir þennan leik. Sem fyrr eru það þá þeir Thiago, Alisson, Milner, Shaqiri, Gomez og van Dijk sem eru frá keppni. Klopp var auðvitað spurður að því hvort hann hyggðist tefla fram mikið af ungum leikmönnum en svaraði því til að það myndi koma í ljós, væri ekki ólíklegt en ekkert ákveðið enn.

Það er því nánast vonlaust að spá fyrir um líklegt byrjunarlið en ég geri fastlega ráð fyrir því að Kelleher verði í markinu og að þeir Neco og Rhys Williams verði í vörninni ásamt Tsimikas. Hver verður miðvörður með Williams er erfitt að segja til um en ef hinn ungi Billy Koumetio spilar verður hann þar með yngsti leikmaðurinn í sögu félagsins til að spila í Meistaradeildinni, aðeins 18 ára og 25 daga gamall. Miðjan er óskrifað blað en Wijnaldum og Henderson hljóta að fá hvíld, frammi er svo ansi líklegt að Origi og Minamino fái tækifæri. Auðvitað viljum við að Liverpool vinni alla leiki sem liðið spilar en fyrirgefum það alveg ef minni spámenn fái tækifæri í kvöld þar sem leikjaálagið er auðvitað heilmikið og á næstu 10 dögum eru fjórir leikir á dagskrá, þar á meðal stórleikur gegn Tottenham á Anfield.

Heimamenn í Midtjylland munu ljúka keppni í neðsta sæti riðilsins en sjá sér auðvitað leik á borði til að krækja í stig vitandi það að Liverpool mun ekki tefla fram sínu sterkasta liði. Brian Priske, stjóri þeirra sagði á sínum blaðamannafundi að þeir muni gera allt sem þeir geta til að ná í góð úrslit og vilji byggja á góðri frammistöðu gegn Atalanta í síðustu viku (þar sem þeir náðu 1-1 jafntefli á Ítalíu). Erik Sviatchenko, fyrirliði þeirra mun snúa aftur til leiks eftir að hafa verið í banni í þeim leik, meiðslavandræði eru ekki mikil og þeir ættu að geta teflt fram sínu sterkasta liði. Eftir 11 leiki í dönsku deildinni sitja þeir á toppnum með 23 stig.

Spáin að þessu sinni er á þá leið að liðin skilji jöfn 1-1. Eigum við ekki að segja að Divock Origi skori eina mark okkar manna í frekar tíðindalitlum leik. En þetta verða úrslit sem bæði lið geta svo sannarlega sætt sig við.

Fróðleikur:

- Diogo Jota er markahæstur Liverpool manna í Meistaradeildinni með 4 mörk í 5 leikjum.

- Okkar menn hafa haldið hreinu í öllum leikjunum í riðlinum fyrir utan leikinn gegn Atalanta á Anfield þar sem ítalska liðið gerði tvö mörk.

- Liverpool er með 12 stig á toppi riðilsins.

- Midtjylland eru með 1 stig á botninum.