Skiptar skoðanir um hálfleiksflautið

Umdeildasta ákvörðunin sem var tekin í leik Liverpool og Manchester United í gærkvöld var líklega ótímabært hálfleiksflaut dómarans. Dómarinn flautaði þegar um fimm sekúndur voru eftir af einnar mínútu löngum uppbótartíma en þá var sending Xerdan Shaqiri á leið til Sadio Mane sem virtist þá við það að komast í gegn. Nokkrir leikmenn gerðu athugasemdir við dómarann Paul Tierney vegna þessa.

Nokkrir fótboltasérfræðingar hafa tjáð sig um málið og hafa skoðanirnar verið misjafnar. En nokkrir fyrrverandi dómarar hafa líka tjáð sína skoðun á atvikinu.

Dermot Gallagher, sem dæmdi lengi í ensku úrvalsdeildinni, hrósaði Tierney fyrir frammistöðuna í leiknum almennt, en sagði að í þessu tilviki hafi hann líklega gert mistök. 

„Það er margt sem getur gert dómaranum erfitt fyrir þó að hann hafi ekki stjórn á atvikum. En þessu stjórnar dómarinn algjörlega og getur komist hjá gagnrýni fyrir. Þegar maður ákveður að uppbótartíminn sé ein mínúta verður að spila allan þann tíma. Það er hægt að spila lengur því það er réttlætanlegt að teygja tímann um 20 sekúndur en ekki mikið lengur en það. En með því að klára ekki tímann er verið að gefa færi á gagnrýni og þá hefur maður kallað hana yfir sig. Miðað við að Tierney dæmdi þennan leik afar vel kom mér á óvart að hann hafi gert sig berskjaldaðan fyrir gagnrýni á þennan hátt.“

Annar fyrrverandi dómari, Mark Clattenburg, hrósaði líka Tierney almennt og segist skilja hvað hann hafi verið að gera, en að þetta hafi engu að síður verið mistök. „Hann vildi ljúka leik á hlutlausu svæði, sem er hefðbundið fyrir dómara. Vandamálið var að á augabragði kom sending frá leikmanni Liverpool og Mane virtist á leið í gegn. Tæknilega séð hefði Tierney átt að láta leik halda áfram út alla mínútuna. En þarna hjálpaði honum að Viktor Lindelof og Mane hættu leik þannig að við vitum ekki hvað hefði gerst næst.“

Það er rétt - við komumst aldrei að því. Þannig að nú er það bara áfram gakk.