Aldrei stoltari að vera leikmaður Liverpool!

Sadio Mané segir að hann hafi aldrei verið stoltari af því að vera leikmaður Liverpool! Hann segist vera hamingjusamur hjá félaginu þó nú gangi erfiðleikar yfir. 

,,Ég hef aldrei verið stoltari af því að vera leikmaður Liverpool. Ég er hamingjusamur. Ég nýt þess virkilega að vera hérna og spila með liðsfélögum mínum hjá Liverpool Football Club."


Það hefur flest farið úrskeiðis hjá Liverpool á leiktíðinni. Sadio segir að erfiðleikar séu hluti af knattspyrnunni. Það þurfi að hafa sig í gegnum erfiðleika og halda trúnni. 

,,Við eigum í erfiðleikum og það gerist stundum hjá liðum. En það er bara hluti af knattspyrnunni. Við þurfum að takast á við erfiðleikana og ekki missa trúna. Þess í stað verðum við að halda áfram að berjast, halda í markmið okkar og vera tilbúnir í næsta slag!"


Sadio Mané hefur ekki leikið jafn vel og á síðustu leiktíðum. Hann er þó búinn að skora 12 mörk. Senegalinn veiktist af COVID-19 í haust og kannski hefur hann ekki enn náð fullum styrk. Í það minnsta hefur einhverjum dottið það í hug. En hvernig sem það er þá er Sadio hamingjusamur hjá Liverpool og það er gott að vita að svo sé!


Sadio kom til Liverpool frá Southampton sumarið 2016. Hann er búinn að spila 207 leiki með Liverpool og skora 93 mörk. Senegalinn er því orðinn einn leikreyndasti maður liðsins fyrir utan að vera einn sá besti.