Spáð í spilin

Það getur margt breyst frá páskum og fram að hvítasunnu. Komið er að lokaleiknum á þessu erfiða keppnistímabili. Það hefur sannarlega gengið á ýmsu og flest farið úrskeiðis sem gat. En þrátt fyrir allt er að miklu að keppa í síðasta leiknum. Með öruggum sigri ætti Liverpool að tryggja sér sæti í Meistaradeildinni á næstu leiktíð!


Rétt fyrir páska hefði þótt óhugsandi að Liverpool ætti kost á einu af fjórum efstu sætum deildarinnar fyrir síðustu umferðina. Eftir sex töp í röð á Anfield Road virtust engir möguleikar á að ná allra efstu sætunum. En trúlega kom síðbúið sigurmark Trent Alexander-Arnold á móti Aston Villa liðinu aftur í gang. Meistararnir hafa leikið vel síðustu vikurnar og nú á hvítasunnu eru möguleikar í stöðunni sem margir töldu að yrðu aldrei til staðar.


Staðan fyrir síðustu umferð er þessi. Liverpool þarf að vinna Crystal Palace á Anfield og helst með nokkrum mörkum. Sem stendur er Liverpool í fjórða sæti með 66 stig. Leicester City er með sama stigafjölda. Liverpool er yfir á markamun sem munar fjórum mörkum. Chelsea er í þriðja sæti stigi á undan. Bikarmeistarar Leicester mæta Tottenham Hotspur á heimavelli en Chelsea leikur við Aston Villa í Birmingham. Liverpool er einu marki yfir Chelsea á markatölu. Keppnin er því á milli Liverpool, Leicester City og Chelsea um tvö sæti. Manchester City hefur tryggt sér Englandsmeistaratitilinn og Manchester United á annað sætið víst. 

Leicester vinnur Tottenham og gæti vel unnið stóran sigur því gestirnir eru veikir fyrir um þessar mundir. Liverpool þarf því helst að vinna með nokkrum mörkum til öryggis. Aston Villa gæti strítt Chelsea. Villa er með gott lið og getur vel gert góða hluti þegar það nær sér á strik. Það er því ekki frágengið að Chelsea vinni sigur á Villa Park. Þó verður að teljast líklegt að Chelsea vinni sigur. 


Sérstakt gleðiefni er að 10.000 áhorfendur verða á Anfield á morgun. Áhorfendur voru á nokkrum leikjum fyrir áramót en svo lokaði farsóttin á að framhald yrði á því. Það verður frábært að hafa fólk í Musterinu og stuðningur þess ætti í raun að fara langt með að tryggja Liverpool sigur í leiknum!


Crystal Palace er með gott lið og á góðum degi getur liðið verið skeinuhætt. Liverpool vann reyndar stórsigur 0:7 á Palace í London stuttu fyrir jól og trónaði þá á toppnum. En Palace er betra lið en það sýndi þann daginn. Roy Hodgson, fyrrum framkvæmdastjóri Liverpool, tilkynnti í vikunni að leikur Liverpool og Crystal Palace yrði síðasti leikur hans sem framkvæmdastjóri Arnanna. Honum hefur vegnað vel með liðið á valdatíma sínum á Selhurst Park og liðið hefur haldið sínu vel í deildinni. 

Liverpool á og verður að vinna á morgun. Liðið hefur náð að koma sér í lykilstöðu með stórgóðri rispu síðustu vikurnar. Það yrði í raun afrek að ná einu af efstu fjórum sætunum ef litið er til hrakfara á slæma kaflanum á leiktíðinni. Liverpool hefur það í hendi sér að ná fjórða sætinu og ef Aston Villa nær að hrekkja Chelsea gæti þriðja sætið orðið staðreynd. En hvað svo sem gerist í Leicester eða Birmingham þá verður Liverpool að vinna. Nú má ekki láta happ úr hendi sleppa!

Liverpool svo gott sem tryggði sér Englandsmeistaratitilinn í fyrrasumar með því að vinna Palace 4:0 á Anfield. Ég spái því að Liverpool vinni 3:0 og nái settu marki. Mohamed Salah skorar tvö mörk og Roberto Firmino eitt. Liverpool verður að ljúka verkefninu. Annað er ekki boðlegt úr því sem komið er!

YNWA!