Alisson með nýjan samning

Það er brjálað að gera hjá samningadeild Liverpool og prentararnir hafa ekki undan að prenta nýja samninga við leikmenn. Alisson hefur skrifað undir nýjan langtíma samning.

Það er ekki síður mikilvægt að halda bestu leikmönnum félagsins áfram í herbúðunum og nú fetar Alisson í fótspor Fabinho og Trent Alexander-Arnold.

Markvörðurinn er nýkominn aftur til æfinga eftir sumarfrí og hafði þetta að segja um fréttir dagsins: ,,Ég held ég hafi ekki eytt miklum tíma í að hugsa málið. Þetta er eithvað sem við höfum byggt upp síðustu þrjú ár, sjálfstraustið og traustið sem ég hef á félaginu og félagið á mér. Ég og fjölskylda mín erum mjög ánægð hér. Börnin hafa komið sér vel fyrir á Englandi, það var auðvitað nýtt land fyrir þau á sínum tíma en þau vaxa og dafna þar. Ég er virkilega ánægður með að ég geti haldið áfram að vinna hér. Það er því virkilega ánægjulegt að ég hafi tekið þessa ákvörðun - sem eins og áður sagði var ekki erfið."

Alisson kom sumarið 2018 frá Roma og hefur síðan þá sannað sig sem einn besti markvörður heims. Hann á auðvitað stóran þátt í titlunum sem hafa unnist á síðustu árum og með landsliði Brasilíu varð hann Suður-Ameríku meistari sumarið 2019. Fyrir tveim árum síðan var hann svo valinn markvörður ársins hjá FIFA.

Til þessa hefur hann spilað 130 leiki fyrir Liverpool, haldið markinu hreinu í 57 leikjum og auðvitað skorað eitt mark mark sem enginn mun gleyma gegn WBA í baráttunni um Meistaradeildarsæti í vor.

,,Við verðum að setja markið hátt og vinna allt sem við keppum um, Meistaradeildina, úrvalsdeildina, bikarkeppnirnar og bara alltsaman. Við höldum áfram. En auðvitað snýst þetta um hvað við gerum úti á vellinum og þar þurfum við alltaf að gefa 100% og jafnvel meira en það. Vonandi getum við orðið enn betri."