Nathaniel Phillips lánaður

Svo því sé nú haldið til haga þá var Nathaniel Phillips lánaður í gær. Hann fer til liðs sem er að berjast um að komast upp í efstu deild. 

Nathaniel var lánaður til Bournemouth sem er í toppbaráttu næst efstu deildar. Liverpool fær 1,5 milljón sterlingspunda í lánsgreiðslu. Að auki bætast við 250.000 í hlut Liverpool ef Bournemouth kemst upp í efstu deild í vor. Býsna góður samningur fyrir Liverpool. 


Nathaniel, sem verður 25 ára í næsta mánuði, ólst upp hjá Bolton Wanderes en kom til Liverpool 2016. Hann var lánsmaður hjá þýska liðinu Stuttgart á leiktíðinni 2019/20. Það keppnistímabil komst Stuttgart upp í efstu deild.


Nathaniel Phillips lék stórt hlutverk á lokakafla síðasta keppnistímabils hjá Liverpool þegar hann var miðvörður við hlið Rhys Williams þegar allir reyndustu miðverðir Liverpool voru meiddir. Hann er aðeins búinn að spila þrjá leiki á þessu keppnistímabili en alls hefur hann leikið 24 leiki með Liverpool og skorað eitt mark.

Nokkur félög í efstu deild höfðu áhuga á að kaupa Nathaniel í síðasta mánuði en Liverpool vildi ekki selja nema fyrir vissa upphæð. Sem sagt ekkert félag bauð nógu hátt og því er hann ennþá leikmaður Liverpool þó hann verði í láni út þetta keppnistímabil.

Nathaniel Phillips sagðist, á Instagram síðu sinni, vera hæstánægður með að vera kominn til Bournemouth og ekki geta beðið eftir að byrja að spila fyrir hönd félagsins. Hann endaði svo á þessum fallegu orðum. ,,Ég óska Liverpool alls hins besta það sem eftir er af þessu keppnistímabili."