Spáð í spilin

Það er Evrópukvöld á Anfield þriðjudagskvöldið 8. mars þegar Inter Milan koma í heimsókn. Okkar menn hafa 2-0 forystu eftir fyrri leik liðanna á Ítalíu.

Sæti í 8-liða úrslitum Meistaradeildar er undir, ljóst er að ítalska liðið mætir pressulítið í leikinn og hafa engu að tapa. Það getur alltaf verið hættulegt að mæta svoleiðis andstæðing en okkar menn eru nú sem betur fer reynslumiklir þegar kemur að stóru leikjunum. Jürgen Klopp fór yfir stöðuna á blaðamannafundi fyrir leik og flutti góðar fréttir af þeim Roberto Firmino, Thiago og Joel Matip. Allir þrír eru byrjaðir að æfa aftur en Firmino, sem ekki hefur spilað síðan í fyrri leiknum á Ítalíu, gæti þurft lengri tíma til að koma sér aftur í leikmannahópinn. Thiago, sem meiddist í upphitun fyrir úrslitaleik Deildarbikarsins ætti að vera klár á ný ásamt Matip sem missti af leik helgarinnar vegna veikinda. Að öðru leyti eru allir leikmenn klárir í slaginn. Hjá Ítalíumeisturunum er einnig lítið um forföll en Nicolo Barella er í leikbanni eins og í fyrri leiknum. Ivan Perisic missti af leik helgarinnar en það var víst vegna smávægilegra meiðsla sem halda honum væntanlega ekki meir frá keppni. Byrjunarlið þeirra verður að öllum líkindum það sama og í fyrri leiknum. Hvað byrjunarlið Liverpool varðar má fastlega gera ráð fyrir litlum breytingum frá sigrinum gegn West Ham um helgina og ég giska á að öftustu fimm verði þeir sömu og síðast. Fabinho verður áfram akkerið á miðjunni og Henderson eða Keita halda sæti sínu og Harvey Elliott fær aftur tækifæri í byrjunarliðinu líkt og hann fékk á Ítalíu. Diogo Jota kemur svo inní framlínuna í stað Luis Díaz, Salah og Mané verða auðvitað á sínum stað. En svo gæti hreinlega verið að Thiago hoppi beint inní liðið á ný, nú eða Curtis Jones sem sýnir nú bara hvað það er vonlaust að spá fyrir um uppstillinguna á miðjunni.

Síðan liðin mættust á Ítalíu hafa okkar menn spilað fimm leiki og skemmst er frá því að segja að allir enduðu með sigri. Inter menn hafa aðeins verið að ströggla uppá síðkastið en í þessum fjórum leikjum sem þeir hafa spilað tapaðist einn, tveir enduðu jafnir og einn leikur vannst. Sigurleikurinn var um síðustu helgi gegn Salernitana í deildinni og voru lokatölur 5-0 þar sem Lautaro Martinez skoraði þrennu og Edin Dzeko tvennu. Ekki gott að þessir tveir hafi reimað á sig markaskóna að nýju en Martinez hafði ekki skorað í nokkrum leikjum í röð og við vonum að hann sé ekki alveg kominn á bragðið á ný. Gefum okkur það samt að varnarmenn Salernitana eru kannski ekki alveg með sömu gæði og varnarmenn Liverpool. Heimamenn þurfa að mæta í leikinn með það að markmiði að sækja til sigurs og hugsa ekki neitt um að verja eitthvað forskot. Klopp talaði á þeim nótum á blaðamannafundinum fyrir leikinn og ljóst að hann vill innprenta þá hugsun í sína menn. Við gerum ráð fyrir fjörlegum leik og miklum sóknarkrafti beggja liða.

Spáin að þessu sinni er sú að Liverpool tryggja sig í 8-liða úrslit Meistaradeildar með 2-1 sigri. Höfum smá spennu í þessu og giskum á að Inter skori fyrsta markið en eftir það missa þeir tökin á leiknum og forystuna um leið.

Fróðleikur:

- Mohamed Salah er markahæstur Liverpool manna í keppninni með átta mörk.

- Edin Dzeko er markahæstur Inter manna með þrjú mörk.

- Jordan Henderson gæti spilað í 430. sinn fyrir félagið í öllum keppnum.

- Það sem af er tímabili hefur fyrirliðinn tekið þátt í flestum leikjum allra leikmanna liðsins eða 37 talsins.