Spáð í spilin

Seinni leikurinn í 8-liða úrslitum Meistaradeildar gegn Benfica er í kvöld, miðvikudaginn 13. apríl og verður flautað til leiks klukkan 19:00.

Staðan er vissulega góð fyrir okkar menn eftir 1-3 sigur í fyrri leiknum í Portúgal. En það þýðir auðvitað ekki að verkefnið verði létt á Anfield eins og við kannski munum frá viðureigninni við Inter Milan í 16-liða úrslitunum. Þar höfðu okkar menn tveggja marka forystu eftir fyrri leikinn á útivelli en Ítalirnir gáfust ekki upp og unnu 0-1 á Anfield, eitthvað sem fáir bjuggust við. Þegar Inter komust yfir fengu þeir heldur betur byr í seglin en stuttu síðar blés hinsvegar ekki byrlega þegar þeir misstu mann útaf með rautt spjald og leikurinn fjaraði út.

Jürgen Klopp fór yfir stöðuna á blaðamannafundi fyrir leik og sagði að ekkert nýtt hefði komið upp í meiðslamálum eftir stórleikinn við City um helgina. Hann tók það einnig fram að undanúrslitaleikurinn gegn City í bikarnum um næstu helgi hefði engin áhrif á liðsvalið í kvöld en hinsvegar hefði leikur síðustu helgar áhrif þar sem einhverjir leikmenn gætu verið þreyttir. Miðað við hvernig Klopp stillti upp um helgina verður að teljast ansi líklegt að menn eins og Konaté, Keita, Díaz og Firmino komi inní liðið og alls ekki ólíklegt að breytingarnar verði fleiri, en það kemur auðvitað í ljós. Hjá Benfica er ljóst að Rafa Silva, sem byrjaði í fyrri leiknum, verður ekki með í kvöld vegna meiðsla. Að öðru leyti eru Portúgalarnir með sama leikmannahóp og síðast.

Liðin hafa mæst fimm sinnum áður á Anfield í Evrópukeppni, þar eru Liverpool með fjóra sigra og Benfica með einn, nánar tiltekið 0-2 sigur í seinni leik 16-liða úrslitanna árið 2006 og samanlagt 3-0 sigur í einvíginu. Þar féllu ríkjandi Evrópumeistarar Liverpool úr leik við fyrstu hindrun í útsláttar keppninni. En síðast þegar liðin mættust á Anfield (árið 2010) sigraði heimaliðið 4-1 og ljóst að við værum alveg sátt við svipuð úrslit í kvöld.

Spáin að þessu sinni er sú að Liverpool tryggir sig áfram í undanúrslit Meistaradeildar í kvöld með 2-0 sigri. Anfield verður að sjálfsögðu skoppandi á Evrópukvöldi og stemmningin frábær. Vonandi getum við farið að hlakka til viðureignar við Villarreal í næstu umferð keppninnar.

Fróðleikur:

- Mohamed Salah er markahæstur Liverpool manna í Meistaradeildinni með átta mörk.

- Þeir Sadio Mané og Diogo Jota hafa skorað þrjú mörk hvor.

- Darwin Núnez er markahæstur hjá Benfica með fimm mörk í keppninni.

- Þetta verður í 12. sinn sem liðin mætast í Evrópukeppni og þar með eru Benfica það lið sem Liverpool hefur oftast mætt í Evrópukeppni í sögu félagsins.

- Liverpool hafa unnið sjö af þessum leikjum og Benfica fjóra.

- Tvisvar sinnum áður hafa liðin mæst í 8-liða úrslitum keppninnar og í bæði skiptin fóru Liverpool alla leið (1978 og 1984).

- Benfica hafa skorað mark í síðustu 18 leikjum sínum í öllum keppnum.