Jota framlengir

Diogo Jota hefur skrifað undir nýjan samning við félagið sem gildir til ársins 2027.

Portúgalinn var keyptur sumarið 2020 frá Úlfunum og hefur svo sannarlega staðið sig vel, fyrsta mark hans fyrir Liverpool kom í strax í fyrsta deildarleik hans, gegn Arsenal í lok september.

Alls urðu mörkin á fyrsta tímabili hans 13 talsins, þar með talið þrenna í Meistaradeildinni á útivelli gegn Atalanta. Hann hélt áfram þar sem frá var horfið á næsta tímabili, skoraði 21 mark í öllum keppnum, þar af 15 í deildinni er liðið vann Deildarbikarinn og FA bikarinn.

Jota hafði þetta að segja í tilefni af nýjum samning: ,,Ég er virkilega stoltur, verð ég að segja. Síðan ég kom hingað fyrir tveim árum hef ég náð að verða einn af mikilvægari leikmönnum liðsins, það var takmarkið hjá mér frá byrjun."

,,Framlenging á samningnum þýðir augljóslega það frá sjónarhorni félagsins að þeir hafa trú á mér sem leikmanni. Frá mér sjálfum séð er virkilega gott að vera búinn að staðfesta að ég verð hér lengur. Nú byrjar nýtt tímabil og við kýlum á þetta."

Jota hefur ekki getað beitt sér mikið á undirbúningstímabilinu vegna meiðsla sem munu halda honum frá keppni eitthvað inní tímabilið. En þegar hann hefur náð sér góðum ætlar hann að gefa allt sem hann á til að vinna fleiri bikara.

,,Því miður fyrir mig hefur undirbúningstímabilið ekki verið gott vegna meiðsla sem ég varð fyrir í síðasta leiknum fyrir sumarfrí með Portúgal. Ég fann ennþá fyrir meiðslunum þegar ég mætti til æfinga á ný og þarf ennþá nokkrar vikur til að jafna mig að fullu."

,,Þegar liðið er að berjast á öllum vígstöðvum, líkt og á síðasta tímabili þá vill maður bara halda því áfram og gera betur, því það er vel mögulegt. Það hvetur mig áfram núna og ég veit að liðsfélagar mínir og starfsliðið allt er á sömu skoðun. Við höfum allt sem þarf til að berjast um titlana sem eru í boði."