Calvin Ramsay lánaður

Liverpool hefur lánað bakvörðinn unga Calvin Ramsey. Hann leikur með sterku liði í næst efstu deild á komandi keppnistímabili. Liðið sem um er að ræða er Preston North End. 


Liverpool keypti Calvin frá Aberdeen í fyrrasumar. Hann hefur aðeins leikið tvo leiki það sem af er fyrir aðallið Liverpool. Hann var mikið meiddur á leiktíðinni sem nú rennur sitt skeið. Fyrst í baki og í febrúar fór hann í aðgerð á hné.



Calvin Ramsey, sem verður tvítugur í sumar, þykir mjög efnilegur og var kjörinn Ungi leikmaður ársins í Skotlandi af blaðamönnum þar í landi eftir leiktíðina 2021/22. Hann er búinn að spila einn landsleik fyrir aðallandslið Skotlands.


Liverpool og Preston hafa síðustu ár unnið nokkuð saman með unga leikmenn. Sepp van der Berg var til dæmis þar í láni leiktíðina 2021/22 og vegnaði vel. Liverpool keypti svo Ben Davies frá Preston 2021.