Kemur allt í ljós

Það kemur í ljós hvort Luis Díaz verður í leikmannahópi Liverpool fyrir leikinn við Luton Town á sunnudaginn. Faðir hans er enn ófundinn eftir að honum var rænt síðasta laugardag. Móðir hans kom fljótlega fram en óvissan vegna föður hans er auðvitað þrúgandi fyrir Luis og fjölskylduna hans. 

Jürgen Klopp sagði á blaðamannafundi í morgun að það komi bara í ljós hvort Luis verður með á sunnudaginn. Kólumbíumaðurinn æfði í gær og fyrradag og allt hefur gengið vel í þeim efnum. Jürgen bætti við að Luis væri auðvitað svefnlítill en að öðru liði honum vel með félögum sínum á æfingum. Hann bætti við að Luis hefði lokaorðið um hvort hann treysti sér til að fara í leikinn. Allt er sem sagt opið í því.

Það kemur svo í ljós á sunnudaginn hvort Luis Díaz verður í leikmannahópnum. Hann hefur verið fjarverandi í síðustu tveimur leikjum. Svo er bara að bíða og vona að góðar fréttir komi sem fyrst frá Kólumbíu.