Þrautaganga hjá Calvin Ramsay

Síðasta ár var sannarlega þrautaganga hjá Skotanum efnilega Calvin Ramsey. Nú þegar nýtt hefur gengið í garð er útlitið eitthvað betra.


Liverpool keypti Calvin, sem er bakvörður, frá Aberdeen fyrir síðustu leiktíð. Hann spilaði tvo leiki fyrir aðallið Liverpool á síðasta keppnistímabili og lék sinn fyrsta landsleik fyrir Skotland. En svo fór allt á versta veg. Hann meiddist illa og þurfti að fara í aðgerð í febrúar í fyrra. Þar með lauk leiktíðinni hjá honum. 

Calvin náði sér vel og var lánaður til Preston North End í sumar. En aftur meiddist hann á hné stuttu eftir að hann kom til Preston og var frá alveg þangað til í nóvember. Hann er búinn að spila tvo leiki með Preston þegar hér er komið við sögu. Calvin spilaði þá leiki í nóvember en þá var ár liðið frá því hann spilaði síðast aðalliðsleik! 

Líf knattspyrnumanna er ekki alltaf dans á rósum og erfiðleikar Calvin Ramsey eru gott dæmi um það. Skotinn nær nú vonandi að hrista meiðsladrauginn af sér og komast á skrið.