Af lánsmönnum

Það verður lokað fyrir félagaskipti leikmanna á mánudagskvöldið. Núna í mánuðinum hefur aðeins verið hreyfing á lánsmönnum. 

Kaide Gordon er kominn heim til Liverpool eftir að hafa verið í láni hjá Norwich City sem spilar í næst efstu deild. Hann lék tíu leiki  með Norwich og skoraði eitt mark. 

Rhys Williams var lánaður til Morecambe fyrir leiktíðina. Hann átti bara að vera þar til áramóta en nú hefur verið ákveðið að hann verði til vors. 

Calvin Ramsay fór til Wigan Athletic fyrir keppnistímabilið en spilaði lítið og kom til Liverpool núna eftir áramótin. En hann var lánaður aftur og nú til Kilmarnock í Skotlandi. 

Í gær kom fram hér á Liverpool.is að Stefan Bajcetic væri farinn frá Red Bull Salzburg til Las Palmas. Hann verður í láni þar út leiktíðina. 

Af þeim leikmönnum sem Liverpool lánaði fyrir leiktíðina hefur Ben Doak vakið mesta athygli. Hann spilar með Middlesbrough. Nokkur lið í efstu deild hafa sýnt Skotanum áhuga en hann er ekki til sölu.