Spáð í spilin - Erfitt verkefni á Villa Park í kvöld

Leikjaprógramm Liverpool er ansi stíft þessa dagana. Í kvöld er 6. leikurinn af 8 í febrúar á dagskrá, gegn Aston Villa á Villa Park.

Aston Villa situr í 9. sæti deildarinnar með 38 stig, 5 stigum frá Meistaradeildarsæti á næstu leiktíð. Unai Emery styrkti liðið töluvert sóknarlega í janúarglugganum, Jhon Duran fór til S-Arabíu, en í staðinn keypti Emery Donyell Malen frá Dortmund og fékk að auki tvo sóknarmenn lánaða. Marcus Rashford frá United og Marco Asensio frá PSG. Asensio þessi var í hópnum hjá Real Madrid í úrslitaleikjunum gegn Liverpool 2018 og 2022, en kom nánast ekkert við sögu. Kom inná sem varamaður í blálokin 2018 og sat svo allan tímann á bekknum 2022.

Í síðustu 7 leikjum liðanna á Villa Park hafa liðin skorað 33 mörk, sem gerir 4,7 stk. í hverjum leik. Liverpool hefur skorað 20 mörk af þessum 33 og aldrei færri en 2 stykki í leik. Ekki einu sinni í mestu niðurlægingu sem við höfum orðið fyrir í Birmingham borg á síðari árum. 7-2 leikinn í október 2020. 

Þetta verður erfiður leikur, ég held að það sé alveg ljóst. Bæði lið eru að sigla í gegnum mikið leikjaálag og bæði þurfa nauðsynlega á stigum að halda. Eins og gengur. En við vonum auðvitað að Liverpool finni einhvern aukakraft til að sigla þremur stigum í höfn. 

YNWA