Momo Sissoko er ekki sáttur

Momo Sissoko var ekki í hópnum sem fór til Frakklands og sat því eftir á Englandi með sárt ennið.  Hann er alls ekki sáttur við Rafa Benítez vegna þessa.

Sissoko stefnir á að ræða um stöðu sína innan liðsins við Benítez eftir áramótin.  Hann sagði við franska útvarpsstöð:  ,,Ég er virkilega vondur.  Leikurinn var í Frakklandi, öll mín fjölskylda er þar og þau vildu sjá mig á vellinum."

,,Þetta eru erfiðir tímar fyrir mig.  Ég hef verið að hugsa um að fara frá félaginu í dágóðan tíma.  Það er ákvörðun stjórans að skilja mig eftir.  Ég virði þá ákvörðun en ég mun spjalla við hann í janúar."

,,Ég get sætt mig við samkeppni um stöður.  En ég hef ekki áhuga á því að spila aðeins í fimmta hverjum leik."

Svo mörg voru þau orð og pirringur Sissoko er skiljanlegur.  Því miður fyrir hann eru aðrir leikmenn ofar í goggunarröðinni og hefur Lucas til að mynda staðið sig betur en Sissoko á tímabilinu.  Ef Sissoko vill fá að spila meira mætti hann bæta boltatækni sína því enginn efast um varnarhæfileika hans.