Mark spáir í spilin

Á sunnudaginn fer fram hreinræktaður toppslagur á Englandi. Liverpool heldur suður til London og leikur við Chelsea. Liðin eru jöfn að stigum á toppnum og ósigruð. Ekki er óeðlilegt að margir telji að hér verði eitthvað undan að láta. Liðin hafa háð margar rimmur síðustu árin og í liðunum gjörþekkja menn hvora aðra. Við sjáum hvað setur en það verður ekkert gefið eftir í rimmunni á Stamford Bridge. 

Fróðleiksmolar frá BBC

- Liverpool er í öðru sæti deildarinnar með jafn mörg stig og Chelsea. 

- Liverpool hefur ekki tapað í síðustu 15 deildarleikjum.

- Chelsea hefur ekki tapað í síðustu 29 deildarleikjum. 

- Chelsea hefur leikið 86 deildarleiki í röð á Stamford Bridge án þess að tapa. Þetta er Englandsmet.

- Liverpool hefur fimm sinnum á leiktíðinni unnið leiki eftir að hafa lent undir.

- Markið sem Dirk Kuyt skoraði í fyrri hálfleiknum í 3:2 sigri á Wigan um síðustu helgi var fyrsta deildarmarkið sem Liverpool skoraði í fyrri hálfleik á þessari leiktíð.

- Einn fyrrum leikmaður Liverpool er hjá Chelsea. Þetta er Nicolas Anelka. Hann lék sem lánsmaður hjá Liverpool á leiktíðinni 2001/02. Hann lék 22 leiki með Liverpool og skoraði fimm mörk.

- Liverpool og Chelsea eru einu liðin í efstu deild sem ekki hafa tapað leik á leiktíðinni.

- Leikur liðanna á Stamford Bridge á síðustu leiktíð. 18. febrúar 2008. Chelsea : Liverpool. 0:0.

Spá Mark Lawrenson

Chelsea v Liverpool

Ég held að þetta sé alveg bókað jafntefli. Liverpool vann Manchester United nýlega svo ég held að þeir verði ánægðir með jafntefli á Stamford Bridge. Rafael Benítez mun örugglega setja fimm menn á miðjuna til að stöðva bakverði Chelsea þá Jose Boswinga og Ashley Cole. Það verður ekkert mark skorað en við getum átt von á tíðindamiklum leik. Dómarinn þarf að vera mjög strangur.

Úrskurður: Chelsea v Liverpool 0:0.