Yossi hefur ekki gefið upp alla von

Yossi Benayoun skoraði tvisvar gegn Arsenal á þriðjudagskvöldið og átti frábæran leik. Hann jafnaði metin 4:4 með seinna marki sínu á lokamínútu leiksins. Áður hafði hann skorað með hetjulegum skalla þegar hann henti sér fram milli tveggja varnarmanna Arsenal. Ísraeleinn lá eftir en reis upp aftur við mikinn fögnuð áhorfenda.  

Yossi veit að staða Liverpool versnaði með jafnteflinu en hann hefur ekki gefið upp alla von um Englandsmeistaratitilinn.

"Þetta verður mjög erfitt því United hefur sterku liði á að skipa en við höfum ekki gefið upp alla von og við munum halda áfram að gera okkar besta. Við ætlum að reyna að vinna alla leikina sem við eigum eftir og vonandi getum við enn unnið deildina."

Liverpool og Arsenal buðu upp á knattspyrnusýningu á Anfield Road á þriðjudagskvöldið. Flestir sparkspekingar telja leikinn þann besta í ensku knattspyrnunni á seinni árum. Yossi segir að leikmenn Liverpool hafi þó ekki verið ánægðir með leikinn.

"Þetta var frábær leikur fyrir stuðningsmennina en hann var ekki eins góður fyrir okkur leikmennina. Við gerðum alltof mörg mistök í leik sem við hefðum átt að vinna. Í fyrri hálfleik áttum við fjögur eða fimm góð færi en þeir skoruðu úr eina markskoti sínu. Við komum sterkir til leiks í síðari hálfleik og náðum 2:1 forystu. Þá réðum við gangi leiksins en svo gerðum við fleiri mistök og þegar við þurftum að fara að sækja aftur refsuðu þeir okkur. Við erum með bestu vörnina í deildinni og líka besta markmanninn en mér fannst liðið ekki verjast vel gegn Arsenal. Við skoruðum fjögur mörk en náðum samt ekki að ná þremur stigum. Það segir okkur að við hefðum átt að standa okkur betur."

Sem fyrr segir þá átti Yossi stórleik gegn Arsenal. Hann er búinn að leika mjög vel núna eftir áramótin og hefur skorað sjö mörk á leiktíðinni. Aðeins Steven Gerrard, Fernando Torres og Dirk Kuyt hafa skorað fleiri mörk.