Jack Hobbs seldur til Leicester City

Liverpool hefur selt Jack Hobbs til Leicester City. Þessi efnilegi miðvörður var lánaður til Leicester áður en þessi leiktíð hófst. Hann hefur verið fastamaður í vörn liðsins sem vann á dögunum þriðju deildina og komst upp í næst efstu deild á nýjan leik. Refirnir féllu úr henni fyrir ári og léku utan tveggja efstu deildanna í fyrsta sinn í sögu félagsins á þessari leiktíð. 

Jack Hobbs þótti leika lykilhlutverk í vörn Leicester á leiktíðinni og forráðamenn liðsins vildu endilega kaupa hann af Liverpool. Lánssamningur hans átti að renna út í vor. Liverpool féllst á að selja Jack og hann er nú orðinn leikmaður Leicester. Jack segist mjög ánægður með vistaskiptin. "Þetta er stórt og mikið félag og ég held að það geti komist alla leið upp í Úrvalsdeildina. Sú trú mín er ein ástæðan fyrir því að ég hef nú gert fjögra ára samning við félagið. Ég gæti ekki verið ánægðari en ég er hérna. Leicester hefur sýnt að þeir hafa mikla trú á mér og með því hefur sjálfstraust mitt aukist mikið."

Liverpool keypti Jack Hobbs frá Lincoln City fyrir 150.000 sterlingspund í ágúst 2005. Þá hafði hann aðeins spilað þrjár mínútur fyrir aðallið Lincoln! Jack varð Unglingabikarmeistari með Liverpool árið 2006. Hann komst í aðallið Liverpool á síðustu leiktíð og lék fimm leiki. Jack þótti standa sig vel í þeim leikjum en nú heldur hann á önnur mið. Við óskum honum góðs gengir með Refunum.